الماتىدا ەڭ ۇزدىك تاۋار وندىرۋشىلەردى انىقتاپ جاتىر

الماتى. قازاقپارات - الماتىدا ءبىر جارىم مىڭ كاسىپورىننىڭ ىشىنەن ەڭ ۇزدىگى تاڭدالىپ جاتىر، دەيدى قازاقپارات ءتىلشىسى.

الماتىدا «قازاقستاننىڭ ۇزدىك تاۋارى» كورمەسىنىڭ ايماقتىق كەزەڭى ءوتىپ جاتىر. بيىلعى جىلى بايقاۋعا 70 تەن استام الماتىلىق كومپانيا قاتىسۋدا، ونىڭ 9 ى كونكۋرستىڭ رەسپۋبليكالىق كەزەڭىنە جولداما الادى.

«ءبىز قالانىڭ 1,5 مىڭ ونەركاسىپتىك كاسىپورىندارىنىڭ ىشىنەن ەڭ ۇزدىگىن تاڭدايمىز. ولار ءونىم ساپاسىنىڭ جوعارى دەڭگەيىن قامتاماسىز ەتەتىن كومپانيالار. قالا يندۋسترياسىندا 45 مىڭنان استام ادام جۇمىس ىستەيدى. ەكونوميكالىق جاعدايعا، جاھاندىق باقتالاستىققا قاراماستان، بۇل سالا بيىلعى جىلى %5,3 ءوستى. جىلدىڭ ءبىرىنشى جارتىسىندا ءوندىرىس شامامەن 400 ميلليارد تەڭگەنى قۇرادى»، - دەدى كورمەنىڭ اشىلۋىندا ءسوز سويلەگەن الماتى قالاسى اكىمىنىڭ ورىنباسارى ساپاربەك تۇياقبايەۆ.

 

ول اكىمدىك تاراپىنان جەرگىلىكتى كاسىپكەرلەر قاشاندا قولداۋعا يە بولاتىنىن ايتتى.

«بۇگىن ءبىز كاسىپكەرلەردى جاڭا ونىمدەردى شىعارۋعا شاقىرامىز. ولاردىڭ ساپاسىن جاقسارتۋعا، جاڭعىرتۋعا، قايتا جابدىقتاۋعا، ينۆەستيتسيا سالۋعا شاقىرامىز. «بيزنەستىڭ جول كارتاسى» باعدارلاماسى اياسىندا جۇزدەگەن الماتىلىق كاسىپكەرلەرگە مەملەكەتتىك قولداۋ كورسەتىلدى»، - دەدى قالا اكىمىنىڭ ورىنباسارى.