شىعىس قازاقستاندا تاعى دا التىن تامىر قازۋشىلار ۇستالدى

وسكەمەن. قازاقپارات - شىعىس قازاقستان وبلىسىندا التىن تامىر قازۋ جيىلەپ كەتكەن.

ۇستالعان 14 ادامنىڭ اراسىندا 15 جانە 16 جاستاعى جاسوسپىرىمدەر دە بار، دەپ حابارلايدى قازاقپارات ءتىلشىسى.

ش ق و پوليتسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، زايسان اۋدانىنداعى كەزەكتى رەيد كەزىندە 14 ادام قولعا تۇسكەن.

«وحوتوزووپروم» مەكەمەسى مەن پوليتسيا قىزمەتكەرلەرى 14 ادامدىق توپتان 42 قاپ التىن تامىر تاركىلەدى. اتالمىش ءشوپ قۇرىپ بارا جاتقان وسىمدىك رەتىندە «قىزىل كىتاپقا» ەنگىزىلگەن. وقيعا زايسان اۋدانىنداعى كەڭساي اۋىلدىق وكرۋگىنە قاراستى كوكتومار ەلدى مەكەنىندە تىركەلدى»، - دەيدى دەپارتامەنتتىڭ باسپا ءسوز قىزمەتىنىڭ باسشىسى ايگەرىم نۇرعازينا.

ۇستالعانداردىڭ بەسەۋى كۇرشىم اۋدانىنىڭ، قالعان توعىزى زايسان اۋدانىنىڭ تۇرعىندارى بولىپ شىققان. ەڭ ۇلكەنىنىڭ جاسى 53 تە بولسا، ەڭ جاسى 15 تەگى جاس ءوسپىرىم ەكەنى انىقتالىپ وتىر.

«ماماندار ساراپتاما تاعايىندادى. ساراپتاما تاركىلەنگەن ءشوپتىڭ التىن تامىر ەكەنىن راستاۋى قاجەت. ەگەر راستالسا، مەملەكەتكە كەلگەن شىعىن ەسەپتەلەتىن بولادى. كۇدىكتىلەرگە قارسى قىلمىستىق كودەكستىڭ 339 بابى بويىنشا سوتقا دەيىنگى تەرگەۋ باستالدى»، - دەيدى دەپارتامەنت وكىلى.

ەسكە سالساق، بۇعان دەيىن اتالمىش كوكتومار ەلدى مەكەنىندە ءدال وسىنداي قىلمىس ۇستىندە الماتى وبلىسىنىڭ تۇرعىندارى ۇستالعان بولاتىن.