اقىندارىمىز قوعامداعى وزەكتى ماسەلەلەردى اشىق ايتۋى ءتيىس - باۋىرجان بايبەك
بۇل تۋرالى قىزىلوردا وبلىسىنا ساپارى بارىسىندا ءوڭىردىڭ بەلسەندى جاستارىمەن ارنايى كەزدەسكەن «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ايتتى، دەپ حابارلايدى قازاقپارات ءتىلشىسى.
پارتيا باسپا ءسوز قىزمەتى تاراتقان اقپاراتقا قاراعاندا، ەركىن فورماتتا وتكەن كەزدەسۋدە ساياسي ۇيىم تاراپىنان جاستارعا قولداۋ كورسەتۋ جۇمىستارى كۇشەيتىلەتىندىگى ايتىلدى.
«كەز كەلگەن پارتيا ءوزىنىڭ بولاشاعى ءۇشىن ساباقتاستىق ءداستۇرىن قالىپتاستىرۋ كەرەك. سوندىقتان ەلباسىمىز ءبىزدىڭ الدىمىزعا جاستارمەن جۇمىستى كۇشەيتۋدى مىندەت ەتىپ قويىپ وتىر. سوعان وراي ءبىز ءوز جۇمىسىمىزعا جاستاردى كوپتەپ جۇمىلدىرىپ، ولاردىڭ قالىپتاسىپ، وسۋىنە جول اشامىز»، - دەگەن پارتيا ءتوراعاسىنىڭ ءبىرىنشى ورىنباسارى مەملەكەت باسشىسى ايتقان جاس ماماندار رەزەرۆىن جاساقتاۋعا پارتيا بەلسەنە قاتىساتىنىن تىلگە تيەك ەتتى.
سونداي-اق باۋىرجان بايبەك قازىرگى جاھاندانۋ جاعدايىندا ءاربىر ۇلت ءوزىن ساقتاپ قالۋ ءۇشىن كۇرەسىپ جاتقانىنا جانە بۇل رەتتە ءبىزدىڭ جاستارعا ۇلكەن مىندەت جۇكتەلىپ وتىرعانىنا نازار اۋداردى.
«ءبىز تاۋەلسىزدىك العان كەزدە بولاشاعىمىزعا سەنىمسىزدىكپەن قاراعاندار بولدى. ەلباسىنىڭ دانا ساياساتىنىڭ ارقاسىندا ءبىز مەملەكەت قۇرىپ، بۇكىل الەمگە ءوزىمىزدىڭ ەل بولا الاتىنىمىزدى دالەلدەدىك. ەندى وسى ەلدىگىمىزدى كۇشەيتىپ، ءوز قۇندىلىقتارىمىزدىڭ اياسىن كەڭەيتۋىمىز كەرەك. انا ءتىلىمىز بەن تاريحىمىزدى دارىپتەپ، الەمدىك دەڭگەيگە الىپ شىعۋ ءبىزدىڭ مىندەتىمىز. وسى رەتتە جاستارىمىز بەلسەندىلىك تانىتۋى ءتيىس»، - دەدى ول.
وسىعان وراي بەلگىلى ايتىسكەر اقىن مۇحتار نيازوۆ ءتول ونەرىمىزدى قولداپ، ايتىستى قايتا جانداندىرۋ جايىندا ءوز ۇسىنىسىن ءبىلدىردى. مۇنداي ۇسىنىستى ريزاشىلىقپەن قابىل الاتىنىن ايتقان باۋىرجان بايبەك پارتيانىڭ الداعى ۋاقىتتا ايتىستى قولعا الىپ، ونىڭ دامۋىنا جاعداي جاسايتىنىن ايتتى.
«پارتيانىڭ قولداۋىمەن ەندى اي سايىن ءار وڭىردە ايتىس ۇيىمداستىرىلادى. ونىڭ العاشقىسى كۇزدە الماتىدا وتەدى. اقىندارىمىز قوعامداعى وزەكتى ماسەلەلەردى اشىق ايتۋى ءتيىس. ءبىراق بارلىعى كونسترۋكتيۆتى بولۋى قاجەت»، - دەدى باۋىرجان بايبەك.
سونىمەن قاتار ول جاستارىمىزدىڭ الەمدىك ەكونوميكا مەن ساياساتتى مەڭگەرۋگە ۇمتىلۋى كەرەكتىگىن ءسوز ەتتى.
ونىڭ ايتۋىنشا، جاس قازاقستاندىقتار ەكونوميكانىڭ نەگىزگى باسىمدىقتارىن قازاق تىلىندە سويلەتىپ، وسى سالاداعى الەمدىك ۇدەرىستەردىڭ قىر-سىرىن ۇيرەنۋگە تالپىنۋى ءتيىس.
مۇنان بولەك، قىزىلوردالىق جاستار وسكەلەڭ ۇرپاق اراسىندا قارجىلىق ساۋاتتىلىقتى كۇشەيتۋ، كاسىپكەرلىكتى ۇيرەتۋ، تاربيەلىك باعىتتاعى وتاندىق مۋلتيپليكاتسيانى دامىتۋ سياقتى ماڭىزدى ماسەلەلەرگە قاتىستى ناقتى ۇسىنىستارىن جەتكىزدى.
ءسوز سوڭىندا پارتيا ءتوراعاسىنىڭ ءبىرىنشى ورىنباسارى جاستاردى ماسىلدىققا بوي الدىرماي، كوزدەگەن ماقساتقا جەتۋ جولىندا ايانباي ەڭبەك ەتۋ كەرەكتىگىن ايتىپ، وسكەلەڭ ۇرپاقتى ەلباسىنىڭ ۇلاعاتتى ءومىر جولىنان ۇلگى الۋعا شاقىردى.