رەسەيدە قىمىز ءوندىرىسى ارتىپ كەلەدى

نۇر-سۇلتان. قازاقپارات - رەسەيدە سوڭعى جىلدارى قىمىز ءوندىرىسى قارقىن الىپ كەلەدى. ءبىر عانا چەليابى وبلىسىندا بۇل كاسىپتى جۇيەلى جولعا قويعان ون شاقتى شارۋاشىلىق بار.

ولار ءوز ونىمدەرىن ارنايى ىدىستارعا قۇيىپ، ساۋدا ورىندارى ارقىلى وتكىزەدى. قازاقتىڭ ۇلتتىق سۋسىنىن كىرىس كوزىنە اينالدىرعان رەسەيلىك كاسىپكەرلەردىڭ بىرىمەن ءتىلشىمىز كەزدەسىپ قايتتى.

 ماعاۋيا قاليەۆ، ءتىلشى:

 - قازىر مەن رەسەيدىڭ وڭتۇستىك ورال وڭىرىندەگى قىمىزدى دەگەن اۋىلدا تۇرمىن. اتاۋىنىڭ ءوزى ايتىپ تۇرعانداي بۇل ەلدى مەكەندە ەجەلدەن بيە بايلاپ، قىمىز باپتاعان. دەرتكە شيپا، بويعا قۋات بەرەتىن قازاقتىڭ ۇلتتىق سۋسىنىنا دەگەن مۇندا سۇرانىس زور. كۇنىنە بۇل فەرمادا 200 ليتردەي قىمىز وندىرىلەدى. مۇندا ساۋىن ۋاقىتى ەكى ساعات سايىن. جىلقى ءسۇتى ارنايى سەحتا وڭدەلەدى. اعارعاننىڭ ءبارى ۇلكەن بوشكەگە جينالىپ، قولدان ىستەلگەن قوندىرعىمەن بابىنا كەلگەنشە پىسىلەدى. سوسىن دايىن قىمىز جارتى ليترلىك ىدىستارعا قۇيىلادى.

فيرداۋس فاحريتدينوۆا، تەحنولوگ:

- ءبىز كۇنىنە 300 بوتەلكەگە قۇيامىز. ساپاسى بويىنشا ەكى التىن مەدالدى جەڭىپ الدىق. باتىرلاردىڭ سۋسىنى دەگەن اتاۋى بار، ونى دالەلدەيتىن سەرتيفيكاتى تاعى بار.

شارۋاشىلىق يەسى سالياحيتدين مۇرتازين قىرىق جىلعا جۋىق جىلقىشىلىقپەن اينالىسادى. وسى ۋاقىت ارالىعىندا ءتۇرلى جاعدايلارعا قاراماستان، قىمىزعا سۇرانىس ارتپاسا، باسەڭدەگەن جوق دەيدى. ءتىپتى ماسكەۋدەن ارنايى تاپسىرىسپەن الدىرتاندار بار ەكەن.

سالياحيتدين مۋرتازين، شارۋا:

- جارتى عاسىردان بەرى شارۋاشىلىق قىمىز وندىرىسمەن اينالىسىپ كەلەدى. شيپالى سۋسىندى ساناتورييلەرگە، بالالار اۋرۋحاناسىنا، دۇكەندەرگە جىبەرەمىز.

 ايتۋلارىنشا جىلقى باسىن وسىرۋگە چەليابى وبلىسىنىڭ باسشىلارى دا مۇددەلى. بۇل ماقساتقا ميلليون رۋبلگە دەيىن سۋبسيديا قارالعان.

الەكساندر رايەۆسكي، چەليابى وبلىسىنىڭ اۋىلشارۋاشىلىق ءمينيسترىنىڭ ورىنباسارى:

 - ءبىزدىڭ وڭىردە جىلقى مالىن وسىرۋگە مۇمكىندىك مول. قازىر اسىل تۇقىمدى بيەلەر ءۇيىرىن قالىپتاستىرۋدى ماقسات ەتىپ وتىرمىز تيىسىنشە ءونىم ساپاسى دا جوعارى بولادى.

 چەليابىنىڭ ءىرى ساۋدا ورىندارىندا قازاقستاندىق قىمىز، باسقا دا ءسۇت ونىمدەرى كەزدەسەدى.

www.24.kz