بۇرىنعى پرەزيدەنت المازبەك اتامبايەۆ تەرگەۋگە ەكىنشى رەت شاقىرتىلدى

نۇر-سۇلتان. قازاقپارات - قىرعىزستان ىشكى ىستەر مينيسترلىگى بۇرىنعى پرەزيدەنت المازبەك اتامبايەۆقا تەرگەۋگە شاقىرتۋ قاعازىن ەكىنشى رەت جىبەردى. بۇل تۋرالى ساياساتكەردىڭ جاقتاستارى ايتتى.

ميليتسيا قىزمەتكەرلەرى شاقىرتۋدى اتامبايەۆتىڭ كوي- تاش اۋىلىنداعى ۇيىنە جەتكىزگەن. قاعازدا بۇرىنعى پرەزيدەنتتىڭ ءى ءى م تەرگەۋ قىزمەتىنە كۋا رەتىندە تۇسىنىك بەرۋى ءۇشىن شاقىرىلاتىنى جازىلعان.

العاشقى شاقىرتۋ اتامبايەۆقا 8 - شىلدەدە جەتكەن. ءبىراق «قۇقىق قورعاۋ ورگاندارىنا سەنبەيتىنىن، زاڭ ماسەلەلەرى بويىنشا ادۆوكاتى سەرگەي سلەساريەۆقا جۇگىنۋگە كەڭەس بەرەتىنىن» ايتقان ەكس- پرەزيدەنت تەرگەۋگە بارماعان.

اتامبايەۆتىڭ ناقتى قانداي ءىس بويىنشا شاقىرىلىپ جاتقانى رەسمي ايتىلمايدى، ءبىراق ادۆوكات سلەساريەۆ ءىس قىلمىستىق توپ مۇشەسى ازيز باتۋكايەۆتىڭ «زاڭسىز بوساتىلۋىنا قاتىستى بولۋى مۇمكىن» دەپ توپشىلايدى. زاڭگەر اتامبايەۆتىڭ ەكس- پرەزيدەنت مارتەبەسى بار ەكەنىن، قىرعىزستان پارلامەنتىنىڭ تيىسپەۋشىلىك ستاتۋسىن الىپ تاستاۋ تۋرالى شەشىمىنىڭ زاڭدى كۇشى جوعىن ايتىپ، ىشكى ىستەر مينيسترلىگىنە حات جولداعان. سلەساريەۆ «ەكس- پرەزيدەنتتىڭ تەرگەۋگە شاقىرىلۋى زاڭسىز» دەيدى.

25 - ماۋسىمدا باس پروكۋرور وتكۋربەك دجامشيتوۆ پارلامەنتتە، 2013 -جىلى اتامبايەۆ باتۋكايەۆتى بوساتۋ تۋرالى تاپسىرمانى ءوزى بەرگەنىن مالىمدەدى.

27 - ماۋسىمدا قىرعىزستان پارلامەنتى المازبەك اتامبايەۆتى ەكس- پرەزيدەنت جانە تيىسپەۋشىلىك ستاتۋستارىنان ايىردى. وعان دەپۋتاتتاردىڭ تاققان ايىبى مەن، سول ايىپتى پروكۋراتۋرانىڭ قولداۋى سەبەپ بولدى.

اتامبايەۆتىڭ ءوزى جانە ونىڭ جاقتاستارى مۇنىڭ بارلىعىن «قارالاۋ» مەن قازىرگى بيلىكتىڭ «ساياسي باسەكەلەسىنەن قۇتىلۋدىڭ امالى» دەپ باعالايدى. اتامبايەۆتىڭ ونداعان جاقتاسى 22 - ماۋسىمنان بەرى ونىڭ كوي- تاشتاعى ءۇيىنىڭ ماڭىنان لاگەر قۇرىپ، شتاب اشقان.

ال 3 - شىلدەدە بىشكەكتە المازبەك اتامبايەۆتىڭ جاقتاسى نارازىلىق شاراسىن وتكىزىپ، قازىرگى بيلىكتىڭ وتستاۆكاعا كەتۋىن تالاپ ەتتى. بۇل شاراعا اتامبايەۆتىڭ ءوزى دە قاتىسقان.

www.azattyq.org