تانىمال بلوگەرلەردىڭ جازبالارى قاداعالانباق
بۇل ۇسىنىستى دانيادا 336 مىڭ وقىرمانى بار تانىمال بلوگەر فيە لاۋرسەن Instagram پاراقشاسىندا ءوز- وزىنە قول سالۋ تۋرالى جازبا قالدىرعاننان كەيىن جاسادى. جازبا جەلىدە ەكى كۇن بويى تۇرعان. كەيىن ونى بلوگەردىڭ وتباسى ءوشىرىپ تاستاعان. ونىڭ وتباسى ف. لاۋرسەننىڭ اۋرۋحانادا ەكەنىن، دەنساۋلىعى دۇرىستالىپ كەلە جاتقانىن راستادى.
«ءبىز الەۋمەتتىك جەلىلەردەگى بالالارىمىز بەن جاستاردىڭ، جالپى بارلىعىنىڭ قامىن جەۋىمىز كەرەك. سوندىقتان، ءبىز ب ا ق ەتيكاسى الەۋمەتتىك جەلىلەردەگى ءىرى پروفيل يەلەرىنە دە قاتىستى بولۋىنا ۇمتىلۋىمىز كەرەك. ال، پاراقشا يەلەرىنە رەداكتورلىق جاۋاپكەرشىلىك ارتىلۋى ءتيىس»، - دەپ جازدى پەرنيللە روزەنكرانس-تايل Twitter-دەگى پاراقشاسىندا.
لاۋرسەننىڭ جازباسىنا 30 مىڭنان استام ادام «ءلۇپىل» باسىپ، 8 مىڭنان استام ادام پىكىر قالدىرعان.
«ادامداردىڭ الەۋمەتتىك جەلىلەردەگى وقىرماندار سانى بەلگىلى ءبىر دەڭگەيگە جەتكەن كەزدە، ولاردىڭ جاۋاپكەرشىلىكتەرى گازەتتىڭ رەداكتورى نەمەسە ءداستۇرلى ب ا ق وكىلدەرىمەن بىردەي بولۋى كەرەك»، - دەدى مينيستر.
ەگەر تانىمال بلوگەر ەرەجەنى بۇزسا، ونىڭ جازباسى ءوشىرىلۋى قاجەت. وقىرماندار سانى بەلگىلى ءبىر دەڭگەيگە جەتكەن تانىمال ادامداردىڭ پروفيلدەرىنىڭ بىرنەشە ادمينيستراتورلارى بولۋى ءتيىس.