شەتەلدەگى قازاق بالالارىنا ارنالعان جازعى مەكتەپ جۇمىسىن باستادى
مەكتەپتىڭ اشىلۋ سالتاناتىنا ءبىلىم جانە عىلىم ءمينيسترى اسحات ايماعامبەتوۆ قاتىسىپ، جەتكىنشەكتەرگە جىلى لەبىزىن ءبىلدىردى، دەپ حابارلايدى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ.
«شەت ەلدەردە جۇرگەن باۋىرلارىمىز - ءبىزدىڭ باعا جەتپەس باي قازىنامىز. «ۇلى دالا ۇرپاعى» جازعى مەكتەبىن ۇيىمداستىرۋداعى نەگىزگى ماقساتىمىز دا - جاستاردىڭ ءتۇپ قازىعىن تانىپ، اتاجۇرتىندا تامىر جايۋىنا ۇلەس قوسۋ. جازعى مەكتەپ قانداستارىمىزدىڭ تاريحي وتانىمەن بايلانىسىن نىعايتىپ، حالقىمىزدىڭ سالت-ءداستۇرىن تانۋىنا، انا ءتىلىن، ەل تاريحىن زەردەلەۋىنە جاعداي جاساۋعا باعىتتالعان. باۋىرلارىمىزدى اتاجۇرتتىڭ بۇگىنگى كەلبەتىمەن تانىسىپ، تۋعان جەرگە دەگەن ساعىنىش سەزىمىن باسسىن دەگەن ۇمىتپەن جيناپ وتىرمىز. الەمنىڭ 7 ەلىنەن كەلگەن قانداستارىمىز ءۇشىن اشىلعان جازعى مەكتەپ جوبا قاتىسۋشىلارىنىڭ كوڭىلىنەن شىعادى دەگەن ۇمىتتەمىز»، - دەدى ءبىلىم جانە عىلىم ءمينيسترى ءوز سوزىندە.
جازعى مەكتەپتى «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمى دۇنيەجۇزى قازاقتارى قاۋىمداستىعى جانە «وتانداستار قورى» كوممەرتسيالىق ەمەس اكسيونەرلىك قوعامىمەن بىرگە ۇيىمداستىرعان. ول 10-24 -شىلدە ارالىعىندا جۇمىس ىستەيدى. بۇگىنگى تاڭدا قازاقستان رەسپۋبليكاسى ءبىلىم جانە عىلىم مينيسترلىگىمەن قاتار، اقپارات جانە قوعامدىق دامۋ مينيسترلىگى، «قازاق ەلى» شەتەلدە تۇراتىن ەتنيكالىق قازاق جاستارى كلۋبى جانە «Generation Next» اقپارات پورتالى جازعى مەكتەپتى وتكىزۋگە قولداۋ تانىتىپ وتىر.
جازعى مەكتەپكە يران يسلام رەسپۋبليكاسى، رەسەي فەدەراتسياسى، موڭعوليا، وزبەكستان، قىرعىزستان، تاجىكستان جانە تۇركىمەنستاندا تۇراتىن قازاق دياسپوراسىنان 12-17 جاس ارالىعىنداعى 500 وقۋشى جينالىپ وتىر. جازعى مەكتەپ باعدارلاماسى شەڭبەرىندە قازاقستان تاريحى جانە قازاق ءتىلى پاندەرى وقىتىلىپ، ۇلتتىق قۇندىلىقتارىمىزدى دارىپتەيتىن مۋزىكا، دومبىرا، قولونەر ۇيىرمەلەرى ارقىلى ۇلتتىق جادىگەرلەرىمىز زەردەلەنەدى.
سونداي-اق، وقۋشىلار ءۇشىن نۇر-سۇلتان قالاسىنىڭ مادەني نىساندارى مەن «بۋراباي» مەملەكەتتىك ۇلتتىق تابيعي ساياباعىنا تانىمدىق ەكسكۋرسيالار ۇيىمداستىرىلادى.