اقتوبەدە ەشكى سۇتىنەن ايران ۇيىتىلا باستادى

اقتوبە. قازاقپارات - اقتوبە قالاسىنىڭ ماڭىنداعى «شەكشەك اتا» شارۋا قوجالىعى ەشكى سۇتىنەن ايران شىعارا باستادى.

بۇعان دەيىن ەشكى ءسۇتىن اشىتىپ، قىمىز ءوندىردى، دەپ حابارلايدى قازاقپارات ءتىلشىسى.

ەشكى وسىرەتىن شارۋاشىلىق 2016 -جىلى ءوز جۇمىسىن باستاعان. قازىر مۇندا 250 باس ەشكى بار.

«كۇنىنە 100 ليترگە دەيىن ءسۇت الىنىپ، سەحتا وڭدەلىپ، قىمىز، ىرىمشىك، قۇرت، ايران دايىندالادى. ءسۇتى دارۋمەندى بولۋى ءۇشىن شارۋاشىلىقتا جوڭىشقا، قىزىلشا ءوسىرىلىپ، مالعا بەرىلەدى. بارلىعى 17 ادام جۇمىسپەن قامتىلعان. شارۋاشىلىقتا 4 تونناعا دەيىن ءسۇت ساقتايتىن تانكەرلەر، ءسۇتتى زالالسىزداندىراتىن ەكى اپپارات جانە ەت وڭدەيتىن سەح بار. جاقىندا ەشكى سۇتىنەن ايران شىعارا باستادىق. ەشكى سۇتىنەن جاسالعان، مايى الىنباعان، قوسپاسى جوق تازا ونىمگە سۇرانىس بولاتىنىنا سەنەمىز»، - دەيدى ساتۋ ءىسىنىڭ مەنەدجەرى ماعاۋيا نۇردان قىزى.

بۇگىن شارۋاشىلىق جۇمىسشىلارىنا «Nur Otan» پارتياسىنىڭ 2030 -جىلعا دەيىنگى باعدارلاماسى تۋرالى ايتىلدى. پارتيانىڭ قالالىق فيليالى ءتوراعاسىنىڭ ءبىرىنشى ورىنباسارى نۇرلىبەك ءجۇسىپوۆ «باقۋاتتى قوعام: ونجىلدىقتىڭ 10 ماقساتى» اتتى باعدارلامادا شاعىن جانە ورتا بيزنەستى دامىتۋ ءۇشىن قارجى قولجەتىمدىلىگىن ارتتىرۋ جايىن جەتكىزدى.