اقتوتى رايىمقۇلوۆا پرەزيدەنت جولداعان ەستافەتانى قابىل الدى

نۇر-سۇلتان. قازاقپارات - ق ر مادەنيەت جانە سپورت ءمينيسترى اقتوتى رايىمقۇلوۆا اباي قۇنانباي ۇلى ولەڭدەرىنەن ءۇزىندى وقىدى، دەپ حابارلايدى قازاقپارات.

ۇلى اقىننىڭ 175 جىلدىعىنا وراي ۇيىمداستىرىلعان ەستافەتانى مينيسترگە ق ر پرەزيدەنتى قاسىم-جومارت توقايەۆ جولداعان بولاتىن.

«ەلىمىزدە شىعىس پەن باتىستىڭ مادەنيەتىن، وركەنيەتىن جەتىك بىلگەن دارا تۇلعا ابايدىڭ 175 جىلدىعى قارساڭىندا ۇلى اقىننىڭ ولەڭدەرىن جاتقا وقۋ ەستافەتاسى باستالعانىن بىلەسىزدەر. كۇنى كەشە سول تىزگىندى مەملەكەتىمىزدىڭ باسشىسى قاسىم-جومارت كەمەل ۇلى توقايەۆتان قابىل الدىم. بار قازاقتىڭ عانا ەمەس، ادامزاتتىڭ الىپ اقىنى - ۇلى اباي جىرلارىن جاتقا وقۋ ەستافەتاسىن مەن جازۋشىلار وداعىنىڭ ءتوراعاسى  ۇلىقبەك ەسداۋلەتكە جانە قازاقستاننىڭ ەڭبەك ەرى، وليمپيادا چەمپيونى جاقسىلىق ۇشكەمپىروۆكە سونىمەن قاتار ەلىمىزدىڭ مادەنيەت، ونەر، سپورت قايراتكەرىنە جانە مايتالمان جاستارعا جولدايمىن»، - دەدى مينيستر ءوزىنىڭ facebook پاراقشاسىندا.

ايتا كەتسەك، الەۋمەتتىك جەلىلەردە قازاقتىڭ ۇلى اقىنى ابايدىڭ ولەڭدەرىن وقۋ ناۋقانى باستالدى. بۇل challenge-دى جەلى قولدانۋشىلارى تاراتىپ جاتىر. Challenge #abai175 حەشتەگىمەن بەلگىلەنگەن. قازىرگى ۋاقىتتا جاريالانىمدار سانى كۇن سايىن ارتۋدا. بۇعان دەيىن ءبىلىم جانە عىلىم ءمينيسترى پرەزيدەنت جولداعان ەستافەتانى قابىل الدى.

سونداي-اق، ق ر پرەزيدەنتى مامىر ايىندا ابايدىڭ 175 جىلدىق مەرەيتويى تۋرالى جارلىققا قول قويعان بولاتىن.