زاڭسىز شەرۋگە شىققاندارعا قانداي شارا قولدانىلدى
بۇل تۋرالى بۇگىن سۋديالاردىڭ كەڭەيتىلگەن كەڭەسىندە قر جوعارعى سوتىنىڭ ءتوراعاسى جاقىپ اسانوۆ ايتتى، دەپ حابارلايدى قازاقپارات ءتىلشىسى.
«ءبارىمىز حاباردارمىز، سوڭعى ۋاقىتتا رۇقسات بەرىلمەگەن شەرۋلەر كوبەيىپ كەتتى. ول - زاڭسىز. ول جايىندا باس پروكۋراتۋرا، ىشكى ىستەر مينيسترلىگىنىڭ باسشىلىعى كۇندەلىكتى قۇلاعىمىزعا قۇيىپ جاتىر. ەستىمەگەن ادام جوق، ءبارىمىز جاقسى بىلەمىز، ونداي شەرۋگە بارۋعا، جانىندا بولۋعا بولمايتىندىعىن ايتىپ جاتىر. نەگە؟ ويتكەنى، ونداي جەرگە بارعان ادام وعان قاتىستى دەپ ەسەپتەلىنەدى. ونىڭ بارلىعىن كۇندە ەستىپ جاتىرمىز»، - دەدى جوعارعى سوت ءتوراعاسى ب ا ق وكىلدەرىنىڭ ساۋالىنا وراي.
ول 6 -شىلدە كۇنى بولعان زاڭسىز شەرۋلەر جايىندا بۇقارالىق اقپارات قۇرالدارىنان ەستىپ بىلگەنىن ايتتى.
«ىشكى ىستەر مينيسترلىگىنىڭ ايتۋىنشا، 100 دەن استام ۇستالدى. سول وقيعا بويىنشا ءبىزدىڭ سوتتارعا اكىمشىلىك قۇقىق بۇزۋشىلىق بويىنشا 40 ءىس ءتۇستى. سولار بويىنشا 22 ادام قاماۋعا الىندى. ونىڭ تەك بىرەۋى عانا 15 تاۋلىككە، ال قالعان 21 ى ءبىر تاۋلىكتەن 10 تاۋلىككە دەيىن قامالدى. سوتتار وسىنداي شەشىم قابىلدادى. ونىڭ زاڭدى نە زاڭسىز ەمەستىگىنە قاتىستى تاعى دا ايتايىن، وعان تۇسىنىكتەمە بەرەتىن ءبىر-اق ادام بار. ول مەن ەمەس. ول - سول شەشىمدى قابىلداعان سۋديا»، - دەدى جاقىپ اسانوۆ.