سۋديالاردىڭ قىزمەتتەن كەتۋى نەلىكتەن جيىلەدى - اسانوۆ سەبەبىن اتادى

نۇر-سۇلتان. قازاقپارات - بۇگىن سۋديالاردىڭ كەڭەيتىلگەن كەڭەسىندە ق ر جوعارعى سوتىنىڭ ءتوراعاسى جاقىپ اسانوۆ سۋديالاردىڭ جۇمىستان كەتۋ سەبەپتەرىن اتادى، دەپ حابارلايدى قازاقپارات ءتىلشىسى.

«جالپى سوت جۇيەسىنىڭ ەڭ باستى ماسەلەسى، ءبىر عانا پروبلەماسى بار دەپ اتاتىن بولساق، ول - سۋديالىق كادرلار. بيىلعا دەيىن سۋديالىققا مىقتى زاڭگەرلەر ۇمتىلمايتىن. نەگە؟ ويتكەنى، ءبىزدىڭ بار قيىنشىلىعىمىزدى، جالاقىمىز تومەن ەكەندىگىن، جۇكتەمە كوپ ەكەندىگىن بىلەدى. ءتىپتى پروكۋرورلار دا، ادۆوكاتتار دا، باسقا زاگەرلەر دە سوتقا كەلگىسى جوق. سوندا «سۋديا بولامىن دەپ كونكۋرسقا قاتىسىپ جاتقاندار كىمدەر؟» دەگەن سۇراق تۋادى. ولاردىڭ باسىم كوپشىلىگى سوتتاعى تەحنيكالىق قىزمەتكەرلەر - سوت حاتشىلارى»، - دەدى ول 2019 -جىلدىڭ 1 -جارتى جىلدىعىنداعى سوت تورەلىگىن جۇزەگە اسىرۋ قورىتىندىسى قارالعان كەڭەستە.

سونىمەن قاتار، ول اتالعان قيىنشىلىقتارعا شىداماي جاسى زەينەتكە جەتپەسە دە ءوز ەركىمەن جۇمىستان شىعىپ كەتەتىن سۋديالار قاتارى كوپ بولعانىن ايتتى.

«جوعارعى سوت كەڭەسىنىڭ وتىرىسىندا ءاربىر ادامدى ءوز ەركىمەن جۇمىستان شىعارۋ ماسەلەسى قارالادى. ءبىز سوندا ودان «سەبەبى قانداي؟» دەپ سۇرايمىز. نەگىزىنەن ەكى-اق سەبەپ ايتادى. «الدىمەن جالاقى از، ودان كەيىن جەكە ومىرگە ۋاقىت جوق» دەيدى. ويتكەنى، كۇنىنە ءاربىر سۋديا 10 شەشىم قابىلدايدى. ءۇشىنشى سەبەپ تە بار. نۇر-سۇلتان، الماتى، شىمكەنت قالالارىنا، وبلىس ورتالىقتارىنا اۋىسۋ، باسشىلىق قىزمەتكە تاعايىندالۋ بويىنشا سوت جۇيەسىنىڭ ىشىندە ادىلدىك بولماعانىن العا تارتادى»، - دەدى جوعارعى سوت ءتوراعاسى.