ورالدا مەكتەپ مۇعالىمى تۋبەركۋلەزدىڭ جۇقپالى تۇرىمەن اۋىرعان

ورال. قازاقپارات - ورالدا مەكتەپ مۇعالىمىنىڭ تۋبەركۋلەزدىڭ اشىق تۇرىمەن اۋىرعانى بەلگىلى بولدى، دەپ حابارلايدى قازاقپارات ءتىلشىسى.

ورال قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ باسقارماسىنان تۇسكەن مالىمەتكە قاراعاندا، وقيعا №47 -ورتا مەكتەپتە تىركەلدى.

26 -ماۋسىم كۇنى اتالعان مەكتەپتىڭ ماتەماتيكا ءپانى مۇعالىمىنىڭ قوس وكپەسىنەن بىردەي ينفيلتراتيۆتى تۋبەركۋلەز ب ك+ اۋرۋىنا (اشىق تۇرىمەن) شالدىققانى جونىندە باسقارماعا جەدەل حابارلاما تۇسكەن. وسىعان وراي سانيتارلىق-ەپيدەميولوگيالىق جانە سانيتارلىق-الدىن الۋ شارالارى قولعا الىندى. مەكتەپتە دەزينفەكسيالاۋ جۇمىستارى جۇرگىزىلدى.

ا. ەسىمدى مۇعالىممەن 16 قىزمەتكەر جانە 74 وقۋشىنىڭ، وتباسىنان 3 ادامنىڭ قارىم-قاتىناس جاساعانى انىقتالدى.

قازىرگى كەزدە بارلىق مۇعالىمدەر مەن وتباسى مۇشەلەرى، وقۋشىلار تەكسەرۋلەر وتۋدە.

«اۋىرعان مۇعالىمنىڭ ءوزى ەمدەلۋدە»، - اتالعان باسقارمادان.