قازاقستاندا قانشا ميلليون ادام جاستار ساناتىنا جاتادى
ءبىر اپتادان استام ۋاقىت بويى زەرەندى كولىنىڭ جاعاسىندا جاتىپ، بيزنەستىڭ الىپپەسىن ۇيرەنگەن جاستار تالىمگەرلەرىمەن بىرگە دايىنداعان جوبالارىن توپ-توپقا ءبولىنىپ قورعادى. ۇزدىك دەپ تانىلعان جوبا اۆتورلارىن ق ر پرەمەر- ءمينيسترىنىڭ ورىنباسارى گۇلشارا ءابدىقالىقوۆا ماراپاتتاپ، شاراعا قاتىسۋشىلارعا لەبىزىن ءبىلدىردى.
«بارلىق جاعىنان مەملەكەت جاستارعا قولداۋ كورسەتۋ كەرەك. وسى جىل جاستار جىلى بولىپ بەلگىلەندى. پرەزيدەنت قاسىم- جومارت توقايەۆ تا جاستارعا كوپتەگەن باسىمدىق بەرىلەتىنىن ايتىپ كەلەدى. جاستاردى قولداۋ ماقساتىندا جول كارتاسى جاسالىپ، 89 باعىت ايقىندالعان بولاتىن. «زەرەن» لاگەرى - سونىڭ ءبىرى. بۇل شارا جىل سايىن بولادى، ءارى قاراي جالعاسادى دەپ سەنەمىن»، - دەدى پرەمەر-ءمينيستردىڭ ورىنباسارى.
ونىڭ ايتۋىنشا، قازاقستاندا 4 ميلليون ادام جاستار ساناتىنا جاتادى.
«29 جاسقا دەيىنگى مامانداردى باسپانامەن قامتۋ ءۇشىن نۇر-سۇلتان، الماتى، شىمكەنت قالالارىندا 3 جىلدىڭ ىشىندە 9000 نان استام ارەندالىق ءۇي بەرىلەتىن بولدى. ەڭ باستى باعىت - جاستاردى كاسىپكەرلىككە باۋلۋ. «جاس كاسىپكەر» باعدارلاماسىنىڭ اياسىندا بيىل 9000 نان استام جاسقا 505 مىڭ تەڭگەلىك گرانتتار ءبولىنىپ وتىر. «باستاۋ» باعدارلاماسى تاعى بار. بازار توڭىرەگىندە جۇرگەن جاستار بار، مارگينال توپتار بار. «باستاۋ» وسىنداي بۋىنعا ارنالعان. ەلدەگى 180 كوللەدج بەن 20 ۋنيۆەرسيتەت نازاربايەۆ ۋنيۆەرسيتەتى ۇلگىسىمەن قايتا جابدىقتالادى. بۇل كەيىن بۇكىل رەسپۋبليكا اۋماعىنا تاراتىلاتىن بولادى. بۇگىنگى لاگەردىڭ تاعى ءبىر ماقساتى - تاجىريبە الماسۋ. الداعى ءبىر ايدا تاعى ەكى لەكپەن سىزدەر سياقتى 400 جاس كەلىپ، بولاشاققا باعدار الىپ قايتادى. ەلىمىزدە 4 ميلليون جاس بار. بۇل - ۇلكەن كۇش. ەرتەڭىمىزدىڭ تىرەگى دە وزدەرىڭىزسىزدەر» ، - دەگەن گۇلشارا ءابدىقالىقوۆا جوباسى وزىق دەپ تانىلعان جاستاردى ماراپاتتادى.
لاگەردىڭ ءۇش كەزەڭى بويىنشا ۇزدىك دەگەن 30 بيزنەس جوبا ىرىكتەلىپ، ولاردىڭ قولداۋعا 30 ميلليون تەڭگە بولىنەتىن بولادى.
جازعى لاگەرگە ەلىمىزدە ءبىلىم الىپ جۇرگەن شەتەلدىك قازاق جاستارى دا شاقىرىلىپتى. رەسەي، وزبەكستان، قىتاي جانە موڭعوليا ەلىندە تۇراتىن جاستار قازاقستاندىق قانداستارىمەن جاقىن تانىسىپ، بىرگە بيزنەس جوبالار قورعاۋعا مۇمكىندىك الىپ وتىر.
«ءبىز بيىل نۇر-سۇلتان قالاسىندا دايىندىق كۋرسىنان وتكەن بولاتىنبىز. جۋىقتا عانا ۇ ب ت سىناعىنان ءساتتى ءوتىپ، وسىندا وقۋعا قالۋعا مۇمكىندىك الدىق. زەرەندىدە ءار ساعاتىمىز، ءار مينۋتىمىز ءتيىمدى ءوتىپ جاتىر. تالىمگەرلەر بار بىلگەندەرىن ۇيرەتىپ جاتىر. ۇلتتىق اق تاعام ستيلىمەن تابيعي بالمۇزداق جاساۋ بۇرىننان ويىمدا بار بولاتىن. بۇگىن سونى ناقتى جوباعا اينالدىردىق» زەرەندىنىڭ جاعاسىنداعى ءمانى كۇندەر ماڭگى ەسىمىزدە قالاتىن شىعار»، - دەيدى موڭعوليالىق جاس اق-ءمولدىر قيالقان قىزى.
ەسكە سالساق، 4 -شىلدە كۇنى اقمولا وبلىسىندا «زەرەن-2019» جاس كاسىپكەرلەر لاگەرىنىڭ العاشقى ماۋسىمى باستالعان بولاتىن.
ەلدىڭ 17 وڭىرىنەن كەلگەن 200 جاس زەرەندى كولىنىڭ جاعاسىندا ەلگەن تانىمال تۇلعالارمەن، جوعارى لاۋازىم يەلەرىمەن كەزدەسىپ، اشىق اڭگىمە وربىتۋگە مۇمكىندىك الۋدا. ق ر اقپارات جانە قوعامدىق دامۋ ءمينيسترى داۋرەن ابايەۆ تا زەرەندىگە بارىپ، جاستارمەن كەزدەسكەن ەدى.