ءبىلىم جانە عىلىم ءمينيسترى اباي قۇنانباي ۇلىنىڭ ولەڭدەرىنەن ءۇزىندى وقىدى

نۇر- سۇلتان. قازاقپارات - ق ر ءبىلىم جانە عىلىم ءمينيسترى اسحات ايماعامبەتوۆ اباي قۇنانباي ۇلىنىڭ ولەڭدەرىنەن ءۇزىندى وقىدى، دەپ حابارلايدى قازاقپارات.

ۇلى اقىننىڭ 175 جىلدىعىنا وراي ۇيىمداستىرىلعان ەستافەتانى مينيسترگە ق ر پرەزيدەنتى قاسىم- جومارت توقايەۆ جولداعان بولاتىن. «ۇلى ابايدىڭ جاس ۇرپاقتىڭ ءبىلىم الىپ، عىلىمدى يگەرۋگە ايرىقشا ءمان بەرگەنى ونىڭ ولەڭدەرىنەن، قارا سوزدەرىنەن بايقالادى. اباي اتامىز ءار ادامدى ەڭ ءبىرىنشى كەزەكتە وزىنە جانە بىلىمىنە سەنۋگە شاقىرادى»، - دەدى ا. ايماعامبەتوۆ.

ول ابايدىڭ «سەنبە جۇرتقا، تۇرسا دا قانشا ماقتاپ» ولەڭىن جاتقا وقىدى.

سەنبە جۇرتقا، تۇرسا دا قانشا ماقتاپ،

 اۋرە ەتەدى ىشىنە قۋلىق ساقتاپ.

 وزىڭە سەن ءوزىڭدى الىپ شىعار

ەڭبەگىڭ مەن اقىلىڭ ەكى جاقتاپ.

 ءوزىڭدى سەنگىشتىكپەن اۋرە ەتپە،

 قۇمارپاز بوپ ماقتاندى قۋىپ كەتپە.

 جۇرتپەن بىرگە ءوزىڭدى قوسا الداسىپ،

سالپىلداپ ساعىم قۋعان بويىڭا ەپ پە؟

 قايعى كەلسە قارسى تۇر، قۇلاي بەرمە،

قىزىق كەلسە، قىزىقپا، وڭعاققا ەرمە.

 جۇرەگىڭە سۇڭگى دە، ءتۇبىن كوزدە،

 سونان تاپقان- شىن اسىل تاستاي كورمە.

كەزەكتى ەستافەتانى مينيستر ەلىمىزدىڭ ءبىلىم جانە عىلىم سالاسىنىڭ قىزمەتكەرلەرىنە، ۇستازدارعا، ج و و رەكتورلارىنا، وقۋشىلار مەن ستۋدەنتتەرگە جولدادى.

ايتا كەتسەك، الەۋمەتتىك جەلىلەردە قازاقتىڭ ۇلى اقىنى ابايدىڭ ولەڭدەرىن وقۋ ناۋقانى باستالدى.

بۇل challenge- ءدى جەلى قولدانۋشىلارى تاراتىپ جاتىر. Challenge #abai175 حەشتەگىمەن بەلگىلەنگەن. قازىرگى ۋاقىتتا جاريالانىمدار سانى كۇن سايىن ارتۋدا. سونداي- اق، ق ر پرەزيدەنتى مامىر ايىندا ابايدىڭ 175 جىلدىق مەرەيتويى تۋرالى جارلىققا قول قويعان بولاتىن.

اۆتور: ايجان سەرىكجان قىزى