قىزىلوردادا كۇيشىلەر بايقاۋى ءوتتى

قىزىلوردا. قازاقپارات -  قىزىلوردا قالاسىندا ا. توقماعامبەتوۆ اتىنداعى قالالىق مادەنيەت ۇيىندە داۋلەسكەر كۇيشى الشەكەي بەكتىباي ۇلى، قۇراقتىڭ دوسجانى جانە شال مىرزانىڭ كۇيلەرىن ناسيحاتتاۋعا ارنالعان «عاسىرلار پەرنەسى» اتتى وبلىستىق كۇيشىلەر بايقاۋى ءوتتى، دەپ حابارلايدى قازاقپارات ءتىلشىسى.

اتالمىش مادەني شارا تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» ماقالالارى اياسىندا ۇيىمداستىرىلدى.

سونداي-اق، ول جاستار جىلى، مەن ۇلتتىق دومبىرا كۇنىنە ورايلاستىرىلدى. اتالمىش شارا بارىسىندا قارماقشى، سىرداريا، شيەلى، جاڭاقورعان اۋداندارى مەن  قىزىلوردا قالاسىنان بارلىعى 8 ونەرپاز كۇمبىرلەتە كۇي توكتى.

وسىلايشا ونەرپازدار سىر بويى كۇي ونەرىنىڭ وزىق ۇلگىسىن كورسەتتى. مادەني شارادا ەرتەدە كۇمبىرلەتە كۇي توككەن الشەكەي بەكتىباي ۇلى، قۇراقتىڭ دوسجانى، شال مىرزا شىعارمالارىنان وزگە، جالدىباي، جانتورە كۇيشىلەردىڭ جانە ارقا، ماڭعىستاۋ، قاراتاۋ وڭىرلەرىنىڭ كۇي قازىناسى كورەرمەن نازارىنا ۇسىنىلدى.

قازىلار القاسىنىڭ شەشىمىمەن بايقاۋدا ءسابيت دىدەبايەۆ ءبىرىنشى ورىندى جەڭىپ الدى. ال ودان كەيىنگى ورىنداردى دانيار سوۆەت، مۇحامەددين كوشەرباي مەن ولجاس ناريمانوۆ جەڭىپ الدى.

بۇدان بۇرىن  قىزىلوردادا «ۇلى دالانىڭ سارقىلماس ءۇنى» اتتى ونەر ەكسپەديتسياسى وتكىزىلگەنىن حابارلاعان ەدىك.