ديماش تا قازاقتىڭ ايماڭداي چەمپيونى - نەسىپ جۇنىسبايەۆ
«جاراتقان ادامعا كوزدى كورسىن دەپ، ال قۇلاقتى ەستىسىن دەپ بەرەدى. كوزىڭ كورىپ، قۇلاعىڭ ەستىگەن سوڭ ول وقيعا جايلى ويلاناسىڭ-تولعاناسىڭ، كوڭىلىڭ قالسا رەنجيسىڭ، ال قۋانساڭ شىڭعا شىققانداي قانات قاعىپ جۇرەسىڭ. ديماشتى سوناۋ قىتاي سەكىلدى 1,5 ميلليارد حالقى بار ەلدى تىزەسىنە تۇرعىزعان كۇننەن بەرى كوزددەن تاسا، كوڭىلدەن الىستاتپاي باقىلاپ جۇرەمىن. سەنبى كۇنى استاناداعى «ارناۋ» اتتى ءان كەشىن تاماشالادىم تەلەجاشىكتەن.
سول كۇنگى كەشىم مىڭ بوياۋعا تولىپ، ءتۇنىم قيال دۇنيەسىنە ساپار شەككەندەي تىلسىم بوپ ءوتتى. وسىدان بىرەر كۇن بۇرىن عانا ديماش بالام «قازاقستان» تەلەارناسىندا دانا نۇرجىگىت اپاسىنا بەرگەن سۇحباتىندا؛ «مەنىڭ باستى ارمانىم - اندەرىم ارقىلى تىڭدارماندارىمدى مىناۋ كۇيكى تىرشىلىگى مول ومىردەن اراشالاپ الىپ، بولەك ءبىر تىلسىم دۇنيەگە الىپ كەتۋ!» دەگەن. ديماش سول ارمانىنا جەتتى. بۇل ءبىر جاستى دا، كارىنى دە ومىرگە قۇشتار قىلا تۇسكەن كەش بولدى! ...ديماشتى ماقتاۋ دا، ونىڭ ءان سالۋ جانە سازگەرلىك ونەرىن باعالاۋ دا ەمەس مەنىڭ بۇگىنگى ماقساتىم. ءوزىمدى سپورتتان گورى ونەر سالاسىن زەرتتەۋشىلەردىڭ ءبىرى، ءوزى ونەرپاز جان سانايتىن ماعان بۇل جۇك تە اۋىرلىق ەتپەس ەدى.
ءبىراق ايتپاقشى بولعان ويىم ودان دا سالماقتى. ديماشتىڭ ساحناداعى قاراپايىمدىعى مەن بوياۋسىز قازاقي بالا مىنەزى ول جايلى كوپ سوزدەن دە كوپ وي ايتقانداي. راس، كەيدە ساحنادا لاقشا سەكىرىپ، قۇلىنشا قۇلدىراڭداي شاپقىلاپ كەتەدى. بۇل قاسيەتتەر دە بۇگىن وزىنە جاراسادى. ول ءالى بالالىق ماكسيماليزمنەن ارىلاتىن جاسقا كەلگەن جوق!
ءتىل تازالىعى مەن وي تازالىعى ءوز الدىنا ءبىر توبە. ۇلت پاسپورتى بوپ سانالاتىن انا تىلدە ءان سالۋى مەن ءسىز بەن بىزگە ءسوز قاتىستارىن ايتامىن. ساحنادا بولعان 2-2,5 ساعاتتا ءوزىنىڭ قازاقتىڭ بالاسى ەكەنىن سەزىنۋى مەن سوعان دەگەن جاۋاپكەرشىلىككە باس يۋىنەن كوزگە جاس تولدى. ديماش ورىس جانە وزگە تىلدەرگە دە جەتىك. راس، بۇگىندە اعىلشىنشا اعىپ تۇرعان قازاق جاستارىن توبىمەن جولىقتىرىپ ءجۇرمىز. ءبىراق، ماسەلە مىنادا؛ ول شەت تىلدەردىڭ باعاسى ءبىز ءۇشىن قاي جاستىڭ دا ءوز انا تىلىندە جەتىك ەكەنىن دالەلدەگەن كەزدە عانا زورايىپ ارتا تۇسۋگە ءتيىس. ديماش بارىمىزگە وسى قاسيەتتەن ساباق بەردى.
ونىڭ اتا-اجەسى مەن اتا-اناسىنا ساحنادا ءجۇرىپ-اق جاس تولشە ەمىرەنۋى بۇل ماسەلەدە سۇراق قالدىرماعانداي. ۇستازدارىنا باس ءيىپ، تاعزىم ەتۋى قانداي؟! تىڭدارماندارىن باعالاپ، ايالاۋى قانداي؟ ءوزىن ونەر ساپارىندا قولداپ-قورشاپ جۇرگەن ارىپتەس دوستارىن ءسۇيۋى قانداي؟ بۇل كورىنىستىڭ ءبارى ونەر، ءبىلىم قۋعان ءار قازاق بالاسىنا ارناۋلى مەكتەپ بولا الاتىنداي!.. ماقتاپ بولدىم. مەن دە قانشا تارتىنعانىممەن ءبىراز جەرگە بارىپپىن.
قايتەيىن، سەنبىنىڭ كەشىندە بولعان ءان كەشى كىمنىڭ دە بولسا ءتىلىن شەشكەدەي... ەندى نەگىزگى ايتپاعىما كوشپەكپىن؛ ديماش قانشا تالانتتى، قانشا اقىلدى بولسا دا قارا جەرگە اياعى بىردە ءتيىپ، بىردە تيمەي جۇرگەن جاس جىگىت. «...جاستىق شاق كوك سەمسەردىڭ ءجۇزى ەمەس پە؟ قايراپ اپ قالىڭ جاۋعا سەرمەگەندەي!» دەپ ءمادي بابامىز جىرلاعانداي، بۇگىندە ءبىر عانا قازاق ەمەس، بۇكىل الەم حالقىنىڭ الاقانىندا جۇرگەن ديماش سەبەپسىز ءسۇرىنىپ قالماۋى ءۇشىن قازاق قوعامى وعان قورعان بولۋى كەرەك! ونى تاياۋ جەردەن ءبىر كورۋ ءۇشىن، ءانىن تۇبىنەن ءبىر تىڭداۋ ءۇشىن جۇلمالاپ، توي-تومالاققا شاقىرا بەرمەۋ كەرەك! ءتىل-كوزدىڭ بار ەكەنىن، تىم جاقسى كورۋدىڭ تەرىس نيەتپەن كورشى قوناتىنىن، مىڭنىڭ ۇناتقانىن ءجۇزدىڭ جەك كورەتىنىن عۇلاما حالقىمىز مۇنان مىڭ جىل بۇرىن ايتىپ تا قويعان. جارق ەتىپ شىققان عاسىرىندا ءبىر تۋار ۇلدارىمىزدى شيرەك تە، جارتى دا عاسىر جاساتا الماي، بارماق تىستەگەن كەزىمىزدى ۇمىتا قوياتىن بولعان جوقپىز. بولماسا، تۇساۋسىز چەمپيون بەكزات ساتتارحانوۆ قايدا، تۇلا بويىنان ۇلت قۇنارى تامشىلاپ تۇرعان مۇستافا وزتۇرىك قايدا، سيقىرلى داۋىسى ءبارىمىزدى تەربەپ وياتاتىن ءمادينا ەراليەۆا قايدا...
سوندىقتان ديماشتى بايگە اتىنداي بولەك ۇستايىق، حاس باتىرداي پەندەلىك تۇرمىسقا ارالاستىرمايىق، جۇرەگىنە جۇك تۇسىرمەيىك، جۇيكەسىنە جەبە جۇمسامايىق!.. اقىلدان ازاپ شەگىپ جۇرگەن جوقپىن. ءبىر كورگەن انشىمە تامسانىپ، سوڭعى ءسوزىمدى دە ايتىپ جاتقان جوقپىن. ديماش بالامنان ونەردە دە، سپورتتا دا، عىلىمدا دا ەسەسى تولىق الىنباي جۇرگەن قازاق حالقىنىڭ بولاشاق ابىرويىنىڭ التىن تاستۇياعىن كورگەندەيمىن. ول بۇگىن-اق چەمپيون! ال، چەمپيوندىقتان كەيىن تۇتاس ۇلت، تۇتاس حالىقتىڭ ەڭ قاسيەتتى بيىگى - سيمۆولعا اينالۋ ءساتى تۋادى. سول جولدا ديماشقا حالىق بولىپ قامقورلىق جاسايىق.»