ەلوردا اكىمى كوپبالالى وتباسىلارعا ارنالعان ءۇيدىڭ قۇرىلىسىمەن تانىستى
بۇگىن شاھار باسشىسى ءا. جانگەلدين، س. راحىموۆ جانە ش. ءۋاليحانوۆ كوشەلەرىنىڭ قيىلىسىندا ورنالاسقان ءۇي-جايلار مەن كولىك تۇراعى بار كوپپاتەرلى تۇرعىن ءۇي كەشەنىنىڭ قۇرىلىس الاڭىنا باردى.
تۇرعىن ءۇي كەشەنىندەگى پاتەر سانى - 1472، كولىك تۇراعىنداعى ورىندار سانى - 1021، ءۇي-جايدىڭ جالپى اۋدانى - 1700 شارشى مەتر.
اكىم نىساننىڭ قۇرىلىس بارىسى مەن جوبانى جۇزەگە اسىرۋداعى وزەكتى ماسەلەلەرمەن تانىستى.
«ينجەنەرلىك ينفراقۇرىلىم جۇرگىزۋ جانە اۋلانى اباتتاندىرۋ جۇمىستارىن ۋاقىتىلى اياقتاۋ، تۇرعىنداردىڭ قاجەتتىلىكتەرىن ەسكەرە وتىرىپ تومەنگى قاباتتاردا مەديتسينالىق جانە مەكتەپكە دەيىنگى ءبىلىم بەرۋ نىساندارىن ورنالاستىرۋ، ش. ءۋاليحانوۆ جانە س. راحىموۆ، كوشەلەرىنىڭ ارالىعىندا ءا. جانگەلدين كوشەسىن سالۋدى قاراستىرۋ تۋرالى ناقتى تاپسىرمالار بەرىلدى»، - دەپ جازادى التاي كولگىنوۆ.
مەملەكەت باسشىسىنىڭ تاپسىرماسىنا سايكەس، بۇل پاتەرلەر جىل سوڭىنا دەيىن كەزەكتە تۇرعان ازاماتتارعا، از قامتىلعان جانە كوپبالالى وتباسىلار مەن ەڭبەك جاستارىنا تاپسىرىلادى.