دومبىرا جاساۋ ەكىنىڭ ءبىرىنىڭ قولىنان كەلە بەرمەيدى - شەبەر

None
None
كوكشەتاۋ. قازاقپارات - دومبىرا جاساۋ ەكىنىڭ ءبىرىنىڭ قولىنان كەلە بەرمەيدى.

بۇل تۋرالى قازاقپارات تىلشىسىنە كوكشەتاۋلىق ون ساۋساعىنان ونەر تامعان ۇستا، اعاشتان ۇلتتىق بۇيىمداردى جاساۋمەن اينالىساتىن شەبەر شوقان ەلامانوۆ ايتتى.

ونىڭ ايتۋىنشا، دومبىرا جاساۋ - ۇرپاقتان ۇرپاققا جالعاسىپ كەلە جاتقان اتاكاسىپ. ەسكىدەن كەلە جاتقان داستۇرگە ادالدىعىن ساقتاعان ادامدار عانا اينالىسا الادى.

«دومبىرا جاساۋ ەكىنىڭ ءبىرىنىڭ قولىنان كەلە بەرمەيدى. ونىڭ وزىندىك قۇپياسى بار. ءار شەبەر ءوز قۇپياسىن كەز كەلگەن ادامعا جايىپ سالمايدى. الايدا، ەڭ باسى قۇپياسى - ول ارينە، دومبىرانىڭ اعاشىنا بايلانىستى. اعاشى قانداي بولسا، ءۇنى دە سونداي اۋەزدى بولىپ كەلەدى»، - دەيدى شوقان ەلامانوۆ.

سونىمەن قاتار، شەبەر دومبىرانىڭ اعاشىنان بولەك، ونى جاساعان ادامنىڭ قولىنا دا بايلانىستى ەكەنىن ايتتى. ءار ۇستا دومبىرانى جاساۋ تەحنولوگياسىن ءبىلۋى ءتيىس.

«الدىمەن، اسپاپقا لايىقتى اعاش تاڭدالادى. ول ابدەن كەپتىرىلەدى. سودان سوڭ دومبىرانىڭ شاناعىن بەلگىلى ءبىر زاڭدىلىقتارعا سايكەس ورتالاستىرۋ قاجەت. بەت تاقتايىنىڭ قاتتىلىعى، قالىڭدىعى - ءبارى ەسەپتەلەدى. ءسال قيىس كەتسە، دىبىس دۇرىس شىقپاۋى مۇمكىن»، - دەيدى ش. ەلامانوۆ.

كەز كەلگەن اعاشتان شاۋىپ، دومبىرا ىستەۋگە بولادى. ءبىراق، ونىڭ بارلىعى دومبىراشىلاردىڭ كوڭىلىنەن شىعا بەرمەيدى. سوندىقتان، شوقان ءار جاساعان دومبىراسىن كاسىبي دومبىراشىلارعا كورسەتىپ، اقىل-كەڭەسىن الىپ وتىرادى.

«مەنىڭ باستى اقىلشىم، دومبىرامنىڭ سىنشىسى - داۋلەسكەر دومبىراشى ساكەن ءبىرجانوۆ. ءار جاساعان دومبىرامدى ساكەڭە كورسەتىپ وتىرامىن. ول كەم-كەتىگى مەن جاقسى تۇسىن ايتىپ وتىرادى. كەلەسى جولى دومبىرا جاساعاندا ونىڭ ەسكەرتۋلەرىن ەسكەرۋگە بارىنشا تىرىسامىن»، - دەيدى شەبەر.

اعاشتان ءتۇيىن ءتۇيىپ، جانسىزعا جان بىتىرگەن شوقان شەبەردىڭ شاپقان دومبىرالارىن وسى كۇنى ەلگە تانىمال، ايتۋلى اقىندار ۇستاپ، ونەر كورسەتىپ ءجۇر. اپتاسىنا ءبىر دومبىرا جاسايتىن شەبەردىڭ سوزىنشە، سوڭعى جىلدارى ۇلتتىق اسپاپقا دەگەن سۇرانىستىڭ ارتقانى بايقالادى.

 

 

 

سوڭعى جاڭالىقتار