ەلوردا كۇنى: ەكى وبلىستىڭ جارمەڭكەسى ءوتىپ جاتىر
«اقمولا وبلىسى ەلوردا كۇنىنە وراي ۇلكەن اۋىلشارۋاشىلىعى جارمەڭكەسى ۇيىمداستىرىلۋدا. بۇگىن 10 اۋدان ءوز ونىمدەرىن ەلوردالىقتار ساتىپ الۋى ءۇشىن ۇسىنسا، ەرتەڭ 9 اۋدان مەن كوكشەتاۋ قالاسىنىڭ اۋىل شارۋاشىلىعى تاۋارلارىن وندىرۋشىلەرى كەلەدى. جالپى 100 توننا جىلقى، سيىر، قوي، قۇس ەتىن اكەلدىك. تاڭەرتەڭگى 8 دەن استام جارمەڭكەنى باستادىق، حالىق كەلىپ قالاعان ونىمدەرىن ساتىپ الىپ جاتىر» ، - دەدى قازاقپارات تىلشىسىنە سۇحبات بەرگەن اقمولا وبلىسى اكىمىنىڭ ورىنباسارى مارات يعالي.
ونىڭ اتاپ وتۋىنشە، اقمولا وبلىسى مەن نۇر- سۇلتان قالاسىنىڭ اكىمدىكتەرى اراسىندا ارنايى كەلىسىم بار. سول كەلىسىمگە سايكەس اقمولا وبلىسى كۇزدە دە ەلوردادا اۋىل شارۋاشىلىعى تاۋارلارىنىڭ جارمەڭكەسىن وتكىزۋدى جوسپارلاپ وتىر.
«جالپى جارمەڭكەگە اكەلگەن ونىمدەرىمىزدىڭ جالپى سالماعى 500 تونناعا جۋىقتايدى. ونىڭ ىشىندە ءسۇت، ماكورون، كونديتەرلىك ونىمدەر، سارى ماي، وسىمدىك مايى، ۇن مەن ۇن ونىمدەرى بار. ەلوردا تۇرعىندارىن وسى جارمەڭكەگە كەلىپ، اران باعاعا اۋىل شارۋاشىلىعى ونىمدەرىن ساتىپ الۋعا شاقىرامىز» ، - دەدى مارات يعالي.
شىنىمەن دە جارمەڭكەدە ساتىپ جاتقان ونىمدەر ەلوردا بازارلارىنداعى باعادان الدە قايدا ارزان. ماسەلەن، جىلقى ەتىن 1700, سيىر ەتىن 1500, قوي ەتىن 1400, قۇس ەتىن 850 تەڭگەگە ساتىپ الۋعا بولادى. جۇمىرتقانىڭ 10 داناسى 160 تەڭگە بولسا، ءسۇتتىڭ ءليترى 205 تەڭگە. ال قايماقتىڭ كەلىسىن 950, سارى مايدى 2200 تەڭگەدەن ساتىپ الۋعا مۇمكىندىك بار. پاۆلودار وبلىسىنىڭ دا اۋىل شارۋاشىلىعى تاۋارلارىن وندىرۋشىلەرى اكەلگەن ونىمدەر دە ارزان. ەكى وبلىستىڭ دا ساتىپ جاتقان ەتتىڭ باعاسى بىردەي. قىمىزدىڭ ءليترى 600 تەڭگە، بالدىڭ كەلىسى 1500 تەڭگەدەن ساتىلۋدا.
