ا ق ش- تا كۇي تارتىپ، قانشا تابۋعا بولادى: قازاق قىزى امەريكالىقتاردى ونەرىمەن تامساندىرۋدا

  نۇر- سۇلتان. قازاقپارات - ەلىمىزدىڭ كلاسسيكالىق مۋزىكاسىن ورىنداپ، شەتەلدىكتەردى تاڭعالدىرىپ جۇرگەن تاميلا ومارحانوۆا ا ق ش- تىڭ چيكاگو قالاسىنا وسىدان ءبىر جىل بۇرىن اتتانعان ەدى.

جاس ونەرپاز Stan.kz تىلشىسىنە شەتەلگە نە ءۇشىن كەتكەنىن، ءومىرى قالاي وزگەرگەنىن جانە ا ق ش- تا مۋزىكانتتاردىڭ قانشا تاباتىنىن اڭگىمەلەپ بەردى.

 سكريپكادا قازاق اندەرىن ورىنداپ، امەريكالىقتاردى تامساندىرىپ جۇرگەن قازاق ارۋى - قۇرمانعازى اتىنداعى قازاق ۇلتتىق كونسەرۆاتورياسىنىڭ تۇلەگى.

دۇنيەجۇزى بويىنشا امەريكا ۇسىناتىن مۇمكىندىكتەرگە قىزىعىپ، ارمان قۋىپ، ا ق ش- قا تابان تىرەگەن ازاماتتاردىڭ سانى جىل وتكەن سايىن ارتۋدا. امەريكاعا دەيىن ەۋروپا مەن ازيانى شارلاپ شىققان وتانداسىمىز تاميلا ومارحانوۆا چيكاگو قالاسىندا ءبىر جىلدان اسا ۋاقىت تۇرىپ جاتىر.

 بويجەتكەن كونتراستار ەلىندە ارمانىنىڭ اسقارىنا جەتكەنشە ءومىر سۇرەتىنىن جاسىرمايدى. ءبىراق "تۋعان ءۇيدىڭ ءتۇتىنى جىلى" دەگەندەي، قايتىپ كەلەر مەكەنى بار ەكەنىن تۇسىنگەن ارۋ قازىرگى ۋاقىتتا ءوز ەلىنىڭ كلاسسيكالىق مۋزىكاسىمەن شەتەلدىكتەردى تاڭعالدىرىپ ءجۇر. سونىمەن قاتار اقش- تاعى ۋنيۆەرسيتەتتەردىڭ بىرىندە مۋزىكا فاكۋلتەتىندە ماگيستراتۋرادا ءبىلىم الۋدى جالعاستىرۋدا.

 "وزگە مەملەكەتكە كەتىپ قالۋدى الدىن- الا جوسپارلامادىم. ءبىراق انگليادا وقىعاندا ءبىلىمىمدى ءارى قاراي دا شەتەلدە جالعاستىرۋ جايلى ويلانعانمىن. سەبەبى، شەتەل تالپىنعان ادامعا كوپ مۇمكىندىك سىيلاپ، جاڭا ادامدارمەن تابىستىرادى، باستامالارعا جول اشادى. شەكتەۋ دەگەن دۇنيە اتىمەن جوق زاماندا ءبىر ورىندا تۇرىپ قالۋدان قورقامىن. ءوز ءىسىمدى قاتتى جاقسى كورسەم دە، تەك قانا وركەستردەگى جۇمىسپەن شەكتەلگىم كەلمەدى"، - دەيدى مۋزىكانت.

ادام ۇنەمى ءوز- ءوزىن دامىتىپ، جەتىلدىرىپ تۇرۋى كەرەك دەپ سانايتىن وتانداسىمىز العاش رەت 2018 -جىلى امەريكاعا كەلگەندە چيكاگودا تۇراتىن قۇربىسى مۇنداعى تىرشلىكپەن تانىستىرىپ، قولدان كەلگەن كومەگىن اياماعان. "وسىدان كەيىن مەن بويىمداعى بار كۇش- جىگەرىمدى جيناپ، ءوزىمدى شىڭدايتىن، ويىمداعىنى جۇزەگە اسىرۋعا كومەكتەسەتىن جولداردى ىزدەي باستادىم"، - دەپ اعىنان جارىلدى ول.

 ەلىمىزدە كاسىبي دەڭگەيى جوعارى بولعان جەرلەسىمىز العاشىندا ا ق ش- تا ءدال وسى ۇدەدەن شىعا الماي، قينالعانىن ايتادى. سەبەبى مۇندا وركەستر مۋزىكانتى بولۋ ءۇشىن وتە سيرەك وتەتىن ىرىكتەۋدەن سۇرىنبەۋ قاجەت ەكەن.

"شەتەلدە مادەني ەسەڭگىرەپ قالۋ، شەت تىلىندە سويلەۋدە، اقشانى ايىرباستاۋدا قينالۋ دەگەن پروبلەمالارعا تاپ بولماي، قالاي ءومىر ءسۇرىپ كەتۋگە بولاتىنىن جاقسى ءبىلدىم. مانچەستەردە جارتى جىل بويى وقىپ- جيناعان تاجىريبەم قيىندىقتاردان وتۋگە كومەكتەستى. ءبىر دە- ءبىر رەت قينالعان جوقپىن دەسەم، جالعان سويلەگەن بولامىن. ءار جەردىڭ ءوز تالابى بار. جۇمىسقا قابىلدانۋ ءۇشىن دە ونىڭ قىر- سىرىن ءبىلۋ قاجەت"، - دەيدى ول.

 الىس- جاقىن ەلدەرگە ءتۇرلى ماقساتتارمەن جول تارتقان ازاماتتار كەيدە تۋعان جەرلەرىن ساعىنىپ، جاڭا ەلدىمەكەنگە ۇيرەنە الماي جاتادى. "بىرەۋ ورتاعا تەز ءسىڭىپ كەتەدى، بىرەۋ جىلدار بويى تۋعان اۋلاسىن، كوشەسىن، ءۇيىنىڭ جانىندا ساتىلعان ناننىڭ ءيىسىن ساعىنىپ جۇرەدى. امەريكا ءتوزىمدى، شىدامدى ادامدارعا ارنالعان مەكەن"، - دەيدى وتانداسىمىز.

 تاميلا ومارحانوۆا ا ق ش- تا جاقسى دۇنيەنىڭ كوپ ەكەنىن، سوندىقتان دا ول قازاقستانداعى بارىن تاستاپ، چيكاگوعا كەلگەنى ءۇشىن ەش وكىنبەيتىنىن ايتادى.

 "كەيىن وكىنەتىنىمدى بىلسەم، ول ىسكە كىرىسپەيمىن. مۇمكىندىكتەردىڭ بار ەكەنىن جانە ونى پايدالاناتىنىمدى ءبىلدىم. تالپىنىپ، تىرىسىپ جۇرگەنىمە ءبىر جىل بولدى. ءومىر بويى ءبىر جەردە وتىرىپ، ارتىنان وكىنگەن بارىنەن دە قورقىنىشتى دەپ ويلايمىن" ، - دەيدى ونەردى جانى سۇيەتىن ارۋ.

 يمميگرانتار ەلى دەگەن اتپەن تانىلعان ا ق ش- قا پايدا كوزىن تاۋىپ، جاقسى اقشا تابۋ ءۇشىن اتتاناتىن ادامدار از ەمەس. تاميلا زاڭدى تۇردە جۇمىس ىستەپ، كەيىن جالاقىسى جوعارى جۇمىس ورنىنا تۇرىپ كەتۋگە كومەكتەسەتىن ءبىراز باعدارلامالار بارىن ايتادى.

 ونەرىنىڭ ارقاسىندا، چيكاگو كوشەلەرى مەن باقتارىندا سكريپكادا قازاق اندەرىن ورىنداۋدى ەرمەگىنە اينالدىرعان قازاق قىزىنان امەريكاداعى تابىس جايىندا سۇراپ كوردىك. ول ەلدە مۋزىكانت رەتىندە قانداي جالاقى الۋعا بولاتىنىن انىقتادىق.

"امەريكادا مۋزىكا يندۋسترياسى دامىعانىنا قاراماستان، قانشا اقشا تاباتىنىڭىز وزىڭىزگە بايلانىستى. جەكە ساباقتاردىڭ قۇنى 50 دوللاردان باستالادى. تويدا ونەر كورسەتۋ - 200 دوللار. وركەستردە جۇمىس ىستەسەڭىز، جالاقىڭىز قالا مەن وركەستردىڭ دارەجەسىنە بايلانىستى ناقتىلانادى. جىلىنا 80 مىڭ دوللاردان 180 مىڭ دوللارعا دەيىن تابا الاسىز. جاقسى جەرگە جۇمىسقا تۇرساڭىز، وتباسىڭىزدى اسىراپ، الەمدى شارلاپ، ءۇي مەن كولىك ساتىپ الۋعا جاعدايىڭىز جەتەتىن بولادى. امەريكا - كوپۇلتتى مەملەكەت. سوندىقتان اميەريكالىقتار فولك جانە شەتەلدىك كومپوزيتورلاردىڭ تۋىندىلارىن جىلى قابىلدايدى"، - دەيدى جاس مۋزىكانت.

 ءتول مۋزىكامىزدى، اسىرەسە، عازيزا جۇبانوۆانىڭ تۋىندىلارىن جاقسى كورەتىن وتانداسىمىز بىلتىر ىشەكتى كۆارتەت ءۇشىن قازاقستاندىق كومپوزيتورلاردىڭ تۋىندىلارىنان جيناق شىعاردى. "سول جۇمىسىممەن قاتتى ماقتانامىن" دەيتىن جاس ونەرپاز ونى ءارى قاراي تاراتۋ ءۇشىن اعىلشىنشا رەداكسياعا وتكىزۋدى جوسپارلاپ وتىر.