قاراعاندىدا شەرتپە كۇي فەستيۆالى ءوتتى

 نۇر-سۇلتان. قازاقپارات - دوستىق ۇيىندە دومبىرا كۇنىنىڭ قارساڭىندا «ۇلى دالا پەرزەنتى» اتتى شەرتپە كۇيدىڭ ءبىرىنشى فەستيۆالى ءوتتى.

ول تانىمال كۇيشى جانە كومپوزيتور سەمبەك ايدوس ۇلىنىڭ 155 جىلدىعىنا ارنالدى، دەپ حابارلادى وبلىس اكىمدىگىنىڭ سايتى.

فەستيۆالگە قازاقستاننان 13 ورىنداۋشى قاتىستى. وعان «جىر قاعانى» اقىندار بايقاۋىنىڭ جەڭىمپازى ايدىن بايىس، كۇيشى، قازاق ۇلتتىق ونەر ۋنيۆەرسيتەتىنىڭ پروفەسسورى جانعالي جۇزباي، ونەرتانۋ دوكتورى اردابي ماۋلەت ۇلى، ونەر قايراتكەرى بولات تاكىشەۆ، سونداي-اق ءداستۇرلى ناقىشتا ورىندايتىن انشىلەر مەدەت وساتايەۆ پەن ايگۇل باقتوراز قىزى قاتىستى.

«فەستيۆال ماقساتى -  سارىارقا كۇيلەرى مەكتەبىن كەڭىنەن ناسيحاتتاۋ جانە شەرتپە كۇي مەكتەبىن دامىتۋ. جاستار اراسىندا دومبىرادا ويناۋدى تانىمال ەتۋ جانە ۇمىت قالعان جانە بەلگىسىز كۇيلەردى جارىققا شىعارۋ»، - دەدى «كۇي كەرۋەنى» شەرتپە كۇي مەكتەبىنىڭ باسشىسى قايروللا ءسادۋاقاسوۆ.

فەستيۆالگە سەمبەك ايدوس ۇلىنىڭ ۇرپاقتارى دا كەلدى. ولار وسى ءىس-شارانى وتكىزۋدىڭ باستاماشىلارى بولدى.

«مەن سەمبەك ايدوس ۇلىنىڭ شوپشەگى بولامىن. ول تانىمال ادام بولدى، الايدا وكىنىشكە وراي، ونىڭ كوپتەگەن تۋىندىلارى بىزگە جەتپەدى. ساقتالعاندارىن تىڭداۋشىلارعا جەتكىزۋگە جانە ناسيحاتتاۋعا تىرىسامىز. ونىڭ دومبىراسى كامەل ءجۇنىسوۆتىڭ ۇيىندە ساقتالعان. ءبىز اكىمشىلىكتىڭ جانە مادەنيەت باسقارماسىنىڭ وسىنداي فەستيۆالدى ۇيىمداستىرىپ، ءبىزدى قولداعانىنا وتە قۋانىشتىمىز»، - دەدى سەمبەك ايدوس ۇلىنىڭ شوپشەگى كايدار سارين.

كومپوزيتور جانە كۇيشى سەمبەك ايدوس ۇلى - قاراعاندى وبلىسىنىڭ شەت اۋدانىنىڭ تۋماسى. فەستيۆال وبلىستىق مادەنيەت، مۇراعات جانە قۇجاتتاما باسقارماسىمەن بىرلەسىپ اكىمشىلىكپەن ۇيىمداستىرىلدى. ءىس-شارا ۇلتتىق دومبىرا كۇنىنە ورايلاستىرىلدى.

 

BAQ. KZ