ترامپ سولتۇستىك كورەيانىڭ شەكاراسىنا اياق باسقان ا ق ش-تىڭ تۇڭعىش پرەزيدەنتى بولدى
الدىمەن ترامپ «بىتىمگە كەلۋ قالاشىعىن» (بىرلەسكەن قاۋىپسىزدىك زوناسى» دەپ تە اتالادى) ءبولىپ تۇرعان اسكەري-دەماركاتسيالىق سىزىققا بەت العان بولاتىن. كەيىن وعان كيم چەن ىن تايانىپ، ولار ءبىر-بىرىمەن قول الىستى. بۇدان ءارى ەكەۋى سولتۇستىك كورەيانىڭ شەكاراسىنا بىرگە اتتادى.
دونالد ترامپ امەريكا قۇراما شتاتتارىنىڭ ءىس باسىنداعى پرەزيدەنتى رەتىندە ك ح د ر شەكاراسىن كەسىپ وتكەن العاشقى باسشى بولعانىن ماقتان ەتەتىنىن اتاپ ءوتتى.
«ءبىزدىڭ كەزدەسۋىمىزدىڭ ءوزى تاريحي ءسات...»، - دەدى امەريكالىق ليدەر كيم چەن ىنگە كەزدەسۋ باسىندا. «ءبىز دامىتىپ وتىرعان قارىم-قاتىناس كوپتەگەن ادامدار ءۇشىن ۇلكەن ماڭىزعا يە دەپ ويلايمىن. جانە بۇل مەن ءۇشىن ۇلكەن ابىروي»، - دەپ قوستى ترامپ.
د. ترامپ سولتۇستىك كورەياعا تابان تىرەگەن ا ق ش-تىڭ العاشقى پرەزيدەنتى ەكەنىن تىلگە تيەك ەتكەن كيم چەن ىن: «بۇل، ونىڭ بارلىق تۇنەرىڭكى وتكەن شاقتان ارىلىپ، جاڭا كەلەشەكتى اشۋعا دايىندىعىن كورسەتەدى»، - دەدى.
ازداعان ۋاقىتتان سوڭ ولاردىڭ جانىنا وڭتۇستىك كورەيانىڭ باسشىسى مۋن جە ين جاقىندادى. ءۇش پرەزيدەنت كەلىسسوزدەر وتكىزۋ ءۇشىن «ەركىندىك ءۇيى» عيماراتىنا بەت الدى. كيم چەن ىن مەن دونالد ترامپ ەكىجاقتى كەزدەسۋدى جابىق ەسىك جاعدايىندا وتكىزدى.