ورالمانداردىڭ بيزنەس باستامالارىنا قولداۋ جاسالادى

نۇر-سۇلتان. قازاقپارات - «وتانداستار قورى» كوممەرتسيالىق ەمەس اكسيونەرلىك قوعامى، «دۇنيەجۇزى قازاقتارى قاۋىمداستىعى» رەسپۋبليكالىق قوعامدىق بىرلەستىگى جانە «اۋىل شارۋاشىلىعىن قارجىلاي قولداۋ قورى» اكسيونەرلىك قوعامى ىنتىماقتاستىق تۋرالى ءۇشجاقتى مەموراندۋمعا قول قويدى.

قۇجاتقا قول قويۋعا ەلباسى نۇرسۇلتان نازاربايەۆتىڭ قازاقستاندا جانە شەتەلدە تۇراتىن وتانداس ورالمانداردى قولداۋ قاجەتتىگى تۋرالى تاپسىرماسى نەگىز بولدى. مەموراندۋمنىڭ ماقساتى - ورالمان وتانداستاردىڭ بيزنەس باستامالارىن قولداۋ جانە دامىتۋ، دەپ حابارلايدى قازاقپارات.

تاراپتار قازاقستان رەسپۋبليكاسىنىڭ ۇكىمەتىنە ورالماندارمەن جۇمىس جونىندەگى ۇسىنىمداردى قالىپتاستىرۋ، مەملەكەتتىك باعدارلامالاردى جانە باسقا دا مەملەكەتتىك قولداۋ شارالارىن ىسكە اسىرۋ جونىندە اقپاراتتىق قولداۋ كورسەتۋ، تاريحي وتانىنا ورالعان جانە شەتەلدە تۇراتىن ورالمان وتانداستاردىڭ وسىنداي باعدارلامالارعا قاتىسۋ مۇمكىندىگىن قامتاماسىز ەتۋ سياقتى باعىتتاردا ىنتىماقتاستىقتى جۇزەگە اسىرۋدى جوسپارلاپ وتىر.

سونداي-اق، «اۋىل شارۋاشىلىعىن قارجىلاي قولداۋ قورى» اكسيونەرلىك قوعامىنىڭ بايلانىس ورتالىعىمەن ينتەگراتسيالاۋدا 1404 ءبىرىڭعاي بايلانىس ورتالىعىن دامىتۋ، قالالار مەن اۋىلدىق جەرلەردە وقۋ-وندىرىستىك ورتالىقتارىن قۇرۋدى قولداۋ جوسپارلانۋدا.

اۋىل شارۋاشىلىعىن قارجىلاي قولداۋ قورى دۇنيە ءجۇزى قازاقتارى قاۋىمداستىعىمەن وبلىستىق فيليالداردىڭ قىزمەتكەرلەرىنە جەدەل ءوزارا ءىس- قيمىلدى بەكىتەدى. سونداي-اق سەرىكتەستەرمەن بىرلەسىپ، شەتەلدە تۇراتىن قازاقتار ءۇشىن قازاقستاندا بيزنەستى دامىتۋعا جاعداي جاساۋ تەتىكتەرىن قاراستىرادى.

«اۋىل شارۋاشىلىعىن قارجىلاي قولداۋ قورى 2013 -جىلدان باستاپ مەملەكەتتىك باعدارلامالار اياسىندا اۋىل كاسىپكەرلىگىنە شاعىن نەسيە بەرۋ وپەراتورى بولىپ جۇمىس ىستەپ كەلەدى. وسى كەزەڭ ارالىعىندا قور 118 ميلليارد تەڭگەگە 52 مىڭ شاعىن نەسيە بەردى، سونىڭ كومەگىمەن اۋىلدىق جەرلەردە 52,6 مىڭنان استام ادام جۇمىسپەن قامتىلدى. وتكەن جىلى ناتيجەلى جۇمىسپەن قامتۋ باعدارلاماسى بويىنشا اۋىل تۇرعىندارىنا، سونىڭ ىشىندە ورالماندارعا جالپى سوماسى 30 ميلليارد تەڭگە بولاتىن 8 مىڭنان استام نەسيە بەرىلدى»، - دەدى «اۋىل شارۋاشىلىعىن قارجىلاي قولداۋ قورى» ا ق باسقارما ءتوراعاسى جاندار وماروۆ. جوباعا «اتامەكەن» ۇ ك پ»، «دامۋ» كاسىپكەرلىكتى دامىتۋ قورى» ا ق، «اۋىل شارۋاشىلىعىن قارجىلاي قولداۋ قورى» ا ق، «كازاگروگارانت» ا ق، «اگرارلىق نەسيە كورپوراتسياسى» ا ق، «جاسىل» ەكونوميكا جانە G- Global-دى دامىتۋ كواليتسياسى» جانە «El Tirеgi» قازاقستاندىق شاعىن جانە ورتا بيزنەس قاۋىمداستىعى قاتىسادى.

اۋىل شارۋاشىلىعى ءوندىرىسىن ۇيىمداستىرۋ، بيزنەس جوسپارلار دايىنداۋ جانە اۋىلدا بيزنەس الەۋەتتى ىسكە اسىرۋ ءۇشىن گرانتتار، جەڭىلدىكتەر مەن سۋبسيديالار الۋعا جاردەم كورسەتۋ مۇمكىندىكتەرى زەردەلەنەدى. اگروونەركاسىپتىك كەشەننىڭ «جاسىل» تەحنولوگيالارىن (تۇقىم، سەبۋ تەحنولوگياسى، مال باسىن كوبەيتۋ، ەت جانە ت. ب. الۋ) پايدالانا وتىرىپ ءسۇت، ەت، وسىمدىك جانە ت. ب. ءوندىرۋ مۇمكىندىكتەرى زەرتتەلەدى. اۋىلدا بيزنەستى ۇيىمداستىرۋ جونىندە پارمەندى مودەل جاسالاتىن بولادى.