رەسەي ۆەنەسۋەلادان اسكەرىن اكەتكەنىن حابارلادى

 نۇر-سۇلتان. قازاقپارات - رەسەي اسكەرى ۆەنەسۋەلادان كەتەدى. بۇل اقپاراتتى كاراكاستاعى رەسەي ەلشىلىگى حابارلادى.

ەلشىلىك وكىلدەرىنىڭ سوزىنشە، بۇعان دەيىن جوسپار بويىنشا جۇمىس ىستەگەن رەسەيلىك ساربازدار 26- ماۋسىمدا ماسكەۋگە يل-62 ۇشاعىمەن ۇشىپ كەتۋى ءتيىس. ازىرگە ناقتى قانشا ادامنىڭ رەسەيگە ۇشاتىنى ايتىلمايدى.

25- ماۋسىمدا Reuters اگەنتتىگى كاراكاسقا رەسەي قورعانىس مينيسترلىگىنىڭ ۇشاقتارى جەتكەنىن حابارلاعان. ءدال وسى ۇشاق ناۋرىز ايىندا ان-124 تاسىمالداۋ ۇشاعىمەن بىرگە كاراكاس اۋەجايىنا قونعان ەدى. ول كەزدە رەسەيدەن شامامەن 100 سارباز اكەلىنگەنى حابارلاندى. Reuters دەرەگىنشە، 24- ناۋرىزدا ۆەنەسۋەلاعا ۇشىپ كەلگەن رەسەيلىك ساربازدار اراسىندا ارنايى اسكەري ماماندار اتاپ ايتقاندا، كيبەرقاۋىپسىزدىك سالاسىندا ماماندانعان اسكەريلەر دە بولعان.

ۆەنەسۋەلاعا رەسەيلىك اسكەري ۇشاقتاردىڭ كەلۋى ۆاشينگتون مەن ماسكەۋ اراسىنداعى ديپلوماتيالىق داۋعا سەبەپ بولعان. اق ءۇي ماسكەۋدى ۆەنەسۋەلانىڭ ىشكى ىسىنە ارالاسۋعا تىرىستى دەپ ايىپتادى. ا ق ش پرەزيدەنتى دونالد ترامپ رەسەي ۆەنەسۋەلادان كەتۋى كەرەك دەپ مالىمدەدى. ال رەسەيدىڭ سىرتقى ىستەر مينيسترلىگى ۇشاقتاردا قارۋ-جاراققا بايلانىستى كەلىسىم-شارتقا قاتىسى بار ماماندار عانا بولعانىن ايتقان.

ۆەنەسۋەلادا جىل باسىنان بەرى وپپوزيتسيا جەتەكشىسى حۋان گۋايدو مەن ەل پرەزيدەنتى نيكولاس مادۋرو اراسىندا تەكەتىرەس جالعاسىپ كەلەدى. گۋايدونى ەلدىڭ زاڭدى پرەزيدەنتى رەتىندە ا ق ش، ەۋروپا ەلدەرىنىڭ باسىم بولىگى، وڭتۇستىك امەريكا ەلدەرى مويىنداعان. مادۋرونى رەسەي، قىتاي، تۇركيا، يران، كۋبا جانە بوليۆيا قولدايدى.

«ازاتتىق»