ارىس: سنارياد جارىقشاقتارى كورشى اۋىلداعى ۇيلەردى زاقىمداعان
اقدالا اۋىلى تۇرعىندارىنىڭ ءبىرى ورىنحان ارىنبايەۆتىڭ ايتۋىنشا، سول قايعىلى كۇنى تەك ارىستىقتار عانا ەمەس، ارىسقا جاقىن ورنالاسقان كورشى كەنتتىڭ تۇرعىندارى دا ۇيلەرىن تاستاپ قاشۋعا ءماجبۇر بولعان.
«قاتتى گۇرسىل ەستىلدى. جارىلىس كەزىندە سناريادتىڭ جارىقشاقتارى ءبىرقاتار كيلومەترگە، ءبىزدىڭ كەنتتىڭ اۋماعىنا دا جەتتى. سونىڭ سالدارىنان ءبىر سنارياد ءۇيدىڭ الدىنداعى «سەپتيكتى»، تاعى ءبىر بولىگى سارايدى زاقىمدادى. يگى بولعاندا ەشكىم زارداپ شەككەن جوق. ءۇيدىڭ ۇستىنە تۇسكەندە نە بولار ەدى؟! نەمەرەلەرىم مەن بالالارىم قورىققاننان جەرتولەگە تىعىلدى. وندا ءبىراز ۋاقىت وتىرىپ، قالعاندارىمەن بىرگە قاشتى»، - دەيدى زەينەتكەر.
بۇدان بولەك، اقساقال كەنتتى ەۆاكۋاتسيالاعاننان كەيىن ءبىر سيىرى جوعالىپ كەتكەنىن ايتىپ، شاعىمداندى. «بارلىعىمىزدى شىمكەنتتەگى 53-مەكتەپكە ەۆاكۋاتسيالادى. مەن كۇن سايىن مالدارعا ازىق بەرۋ ءۇشىن ۇيگە كەلىپ ءجۇرمىن. ولارعا قاراۋ كەرەك قوي، ونىڭ ءبارىن كىم ىستەيدى؟! ءار ادامنىڭ مالدارى ورىستە ءجۇر، ولار جوعالىپ كەتۋى نەمەسە ۇرلانۋى مۇمكىن عوي»، - دەيدى ول.
ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24- ماۋسىم كۇنى تاڭەرتەڭ جارىلىس بولدى. سالدارىنان ءۇش ادام قازا تاپتى - ارىس تۇرعىنى مەن ەكى اسكەري قىزمەتشى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى.