ارىس قالاسىندا ءورت تولىق ءسوندىرىلدى - ق ر قورعانىس ءمينيسترىنىڭ ورىنباسارى

ارىس. قازاقپارات - جارىلىس بولعان ارىس قالاسىندا ءورت تولىق سوندىرىلگەن. بۇل تۋرالى تۇركىستان وبلىسىندا قۇرىلعان جەدەل شتابتا ق ر قورعانىس ءمينيسترىنىڭ ورىنباسارى باقىت قۇرمانبايەۆ مالىمدەدى، دەپ حابارلايدى قازاقپارات ءتىلشىسى.

ارىستاعى توتەنشە جاعدايدان كەيىنگى اتقارىلعان جۇمىستار مەن قالانىڭ قازىرگى جاي-كۇيىن بايانداعان قورعانىس ءمينيسترىنىڭ ورىنباسارى ءورت ءسوندىرۋ شارالارىنا دا توقتالىپ ءوتتى.

«قالاداعى نەگىزگى كوشەلەر مەن الاڭداردىڭ ءبارى تەكسەرىلىپ، تازالاندى. ءبىزدىڭ ساپەر ماماندارىمىز 500 دەي سنارياد قالدىعى مەن جارىلعىش زاتتاردى تاۋىپ، زالالسىزداندىردى. قورعانىس مينيسترلىگى تاراپىنان تۇرعىنداردىڭ قاۋىپسىزدىگىن ساقتاۋ باعىتىندا ءتيىستى شارالار اتقارىلۋدا. ەندى ءبىز قالاداعى بارلىق ءۇيدىڭ اۋلاسىن تولىق تەكسەرەمىز. ءدال قازىر قالاعا ەشكىمدى كىرگىزە المايمىز. بۇعان تۇرعىنداردىڭ تۇسىنىستىكپەن قاراۋىن وتىنەمىز. ارىستىقتاردىڭ قاۋىپسىزدىگى باستى نازاردا بولۋى ءتيىس»، - دەدى باقىت قۇرمانبايەۆ.

ءوز كەزەگىندە توتەنشە جاعدايلار جونىندەگى كوميتەت ءتوراعاسى ۆلاديمير بەككەر قاۋىپ بۇلتى سەيىلگەنىن، الاڭداۋعا نەگىز جوق ەكەنىن جەتكىزدى.

«كەيبىر اقپارات قۇرالدارىندا ادامدار ءىز-ءتۇسسىز جوعالدى دەگەن اقپارات تارادى. بۇل نەگىزسىز ەكەنىن مالىمدەيمىن. باستاپقىدا كوشۋ بارىسىندا تۇرعىندار ءبىر-بىرىنە حابارلاسا الماي، قيىندىقتار كەزدەسكەن بولاتىن. قازىر ول ماسەلە شەشىلىپ، تۋىستار دا، بالالار دا تابىلىپ جاتىر. سونىمەن بىرگە الەۋمەتتىك جەلىلەردەگى ءىرى جارىلىس بولاتىنى، قويمالاردان سۋ جىبەرىلەتىنى تۋرالى قاۋەسەتتەر دە جالعان. قازىرگى تاڭدا وبلىستاعى سۋ قويمالارى تۇراقتى رەجيمدە جۇمىس ىستەپ تۇر جانە ول جۇمىس رەجيمىن وزگەرتۋ تۋرالى جوسپار جوق. سوندىقتان رەسمي راستالعان دەرەكتەرگە عانا سەنۋلەرىڭىزدى سۇرانامىز»، - دەدى ۆلاديمير بەككەر.