پرەزيدەنتتىڭ بۇل جارلىعى حالىقتى ىنتالاندىرادى - استانالىق انا

نۇر-سۇلتان. قازاقپارات - كوپبالالى انا رەتىندە اتاۋلى الەۋمەتتىك كومەك الاتىن ەلوردالىق ايجان بايعوزيەۆا ق ر پرەزيدەنتى قاسىم-جومارت توقايەۆ قول قويعان ەل ازاماتتارىنىڭ قارىز جۇكتەمەسىن ازايتۋ تۋرالى جارلىققا قاتىستى ءوز ويىن ايتتى، دەپ حابارلايدى قازاقپارات ءتىلشىسى.

«مويىنداۋ كەرەك، ەشكىم قارىزعا جەتىسكەننەن كىرمەيدى. نەسيە دە سول سياقتى. بارار باسپاناڭ، ىشەر تاماعىڭ بولسا، نەسيە الۋىڭ ەكىتالاي. ال بۇگىنگى قاۋلىنىڭ شىعۋى وتە دۇرىس قادام دەپ ويلايمىن. پرەزيدەنت وتە دۇرىس ىستەگەن. مۇنداي جاڭاشىلدىققا ءبىز وتە قۋانىشتىمىز»، - دەيدى استانالىق انا.

ايجان بايعوزيەۆا وتاعاسىمەن بىرگە 4 بالا تاربيەلەپ وتىر. سول ءۇشىن اتاۋلى الەۋمەتتىك كومەك تە الادى. مويىندارىندا تولەنىپ بىتپەگەن نەسيەلەرى بار.

«ءوز جانۇيامىزعا كەلەر بولساق، كۇيەۋىمنىڭ اتىندا نەسيە بار. ۇيدە بالامەن وتىرعاندىقتان، ماعان جۇمىسسىز رەتىندە بەرمەي قويعان. ءتورت بالامىزعا اتاۋلى الەۋمەتتىك كومەك الامىز. قازىر مەملەكەت بارلىق قازاقستاندىقتاردى الەۋمەتتىك تۇرعىدا قولداۋ ءۇشىن ءتۇرلى شارالار قابىلداپ جاتىر. مۇنى ىنتالاندىرۋ دەپ ايتۋعا بولادى. مەملەكەت كومەكتەسەدى ەكەن دەپ، ەڭبەكتى ۇمىتىپ، قول قۋسىرۋعا دا بولمايدى»، - دەيدى ول.

ايتا كەتسەك، كەشە ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ قارىز جۇكتەمەسىن ازايتۋ تۋرالى» جارلىققا قول قويعان بولاتىن.