ارىس قالاسىندا قاۋىپسىزدىك شارالارى تولىق ساقتالىپ، دەزينفەكسيا جۇمىستارى جۇرگىزىلەدى

ورداباسى. قازاقپارات - ورداباسى اۋدانى، اقجول اۋىلىنداعى جەدەل شتابتا ارىستاعى توتەنشە جاعدايدان كەيىنگى اتقارىلعان جۇمىستار جانە قالانىڭ قازىرگى جاي-كۇيى جونىندە باسپا ءسوز ءماسليحاتى وتكىزىلدى، دەپ حابارلايدى قازاقپارات.

وڭىرلىك جانە رەسپۋبليكالىق ب ا ق وكىلدەرى قاتىسقان جيىندا تۇركىستان وبلىسىنىڭ اكىمى ءومىرزاق شوكەيەۆ، «Nur Otan» پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆ، ق ر قورعانىس ءمينيسترىنىڭ ورىنباسارى باقىت قۇرمانبايەۆ، توتەنشە جاعدايلار جونىندەگى كوميتەت ءتوراعاسى ۆلاديمير بەككەر، ەلىمىزدىڭ باس سانيتارى جانداربەك بەكشين، پروكۋراتۋرا جانە ۆەتەريناريا سالاسىنىڭ وكىلدەرى قاتىستى. سپيكەرلەر ارىس تۇرعىندارىن مازالاپ جۇرگەن وتكىر سۇراقتارعا جاۋاپ بەردى.

ق ر قورعانىس ءمينيسترىنىڭ ورىنباسارى باقىت قۇرمانبايەۆ ارىس قالاسىندا ءورت سوندىرىلگەنىن مالىمدەدى.

«قالاداعى نەگىزگى كوشەلەر مەن الاڭداردىڭ ءبارى تەكسەرىلىپ، تازالاندى. ءبىزدىڭ ساپەر ماماندارىمىز 500 دەي سنارياد قالدىعى مەن جارىلعىش زاتتاردى تاۋىپ، زالالسىزداندىردى. قورعانىس مينيسترلىگى تاراپىنان تۇرعىنداردىڭ قاۋىپسىزدىگىن ساقتاۋ باعىتىندا ءتيىستى شارالار اتقارىلۋدا. ەندى ءبىز قالاداعى بارلىق ءۇيدىڭ اۋلاسىن تولىق تەكسەرەمىز. ءدال قازىر قالاعا ەشكىمدى كىرگىزە المايمىز. بۇعان تۇرعىنداردىڭ تۇسىنىستىكپەن قاراۋىن وتىنەمىز. ارىستىقتاردىڭ قاۋىپسىزدىگى باستى نازاردا بولۋى ءتيىس» - دەدى ول.

توتەنشە جاعدايلار جونىندەگى كوميتەت ءتوراعاسى ۆلاديمير بەككەر قاۋىپ بۇلتى سەيىلگەنىن، الاڭداۋعا نەگىز جوق ەكەنىن جەتكىزدى.

«كەيبىر اقپارات قۇرالدارىندا ادامدار ءىز-ءتۇسسىز جوعالدى دەگەن اقپارات تارادى. بۇل نەگىزسىز ەكەنىن مالىمدەيمىن. باستاپقىدا كوشۋ بارىسىندا تۇرعىندار ءبىر-بىرىنە حابارلاسا الماي، قيىندىقتار كەزدەسكەن بولاتىن. قازىر ول ماسەلە شەشىلىپ، تۋىستار دا، بالالار دا تابىلىپ جاتىر. سونىمەن بىرگە الەۋمەتتىك جەلىلەردەگى ءىرى جارىلىس بولاتىنى، سۋ قويمالاردان سۋ جىبەرىلەتىنى تۋرالى قاۋەسەتتەر دە جالعان. قازىرگى تاڭدا وبلىستاعى سۋ قويمالارى تۇراقتى رەجىمدە جۇمىس ىستەپ تۇر جانە ول جۇمىس رەجىمىن وزگەرتۋ تۋرالى جوسپار جوق. سوندىقتان رەسمي راستالعان دەرەكتەرگە عانا سەنۋلەرىڭىزدى سۇرانامىز»،- دەدى ول.

ال ەلىمىزدىڭ باس سانيتارى جانداربەك بەكشين ارىس قالاسىندا رادياتسيانىڭ مولشەرى تۇراقتى دەڭگەيدە ەكەنىن ايتتى.

«ەڭ ءبىرىنشى ءبىزدىڭ ماماندار ارىس قالاسىندا دەزينفەكتسيا جۇمىستارىن جۇرگىزەدى. قوعامدىق ورىندار، قوقىس كونتەينەرلەرى، نىساندار تولىق تازالانادى. قالاداعى اۋىز سۋ جۇيەسى قاتاڭ قاداعالانادى. سۋ قۇرامى، قۇبىرلار تەكسەرىلەدى. ەۆاكۋاتسيالىق ورىنداردا دا ماماندارىمىز جۇمىس ىستەپ جاتىر. جالپى تۇركىستان وبلىسىندا ەپيدەميولوگيالىق جاعداي تۇراقتى»، - دەدى.

سونداي-اق باسپا ءسوز ءماسليحاتىندا ۆەتەرينار ماماندار ارىستاعى ءۇي اۋلاسىندا قالعان ءتورت-تۇلىك بويىنشا جۇمىس جۇرگىزەتىنى ايتىلدى. ولگەن مال زالالسىزداندىرىلىپ، زاڭعا سايكەس وتەماقى بەرۋ جولدارى قاراستىرىلادى. وبلىس اكىمى ءومىرزاق شوكەيەۆ الداعى ءۇش كۇندە ەۆاكۋاتسيالىق قابىلداۋ ورتالىقتارىنىڭ جۇمىسى كۇشەيتىلىپ، گۋمانيتارلىق كومەك بەرۋ شاراسى جالعاساتىنىنا توقتالدى. وسى يگى ىسكە اتسالىسىپ جۇرگەن بارشا ازاماتتارعا العىسىن ايتا كەلە ارىس قالاسىنداعى نىساندار قالپىنا كەلتىرىلىپ، تۇرعىنداردىڭ جاعدايى جاسالاتىنىن جەتكىزدى.