كوپ بالالى انا: مەملەكەت باسشىسىنىڭ نەسيەگە بايلانىستى جارلىعى قاتتى قۋانتتى
«بۇل ءبىز ءۇشىن كۇتپەگەن جاڭالىق بولدى، سول سەبەپتى باسىندا قالاي قابىلدارىمىزدى دا بىلمەي قالدىق. مۇنداي وزگەرىستەرگە وتە قۋانىشتىمىز. ءبىزدىڭ دە نەسيەمىز بار، تولەنبەگەن از بولىگى قالدى»، - دەدى ول.
ونىڭ ويىنشا، تۇرعىندار اراسىنداعى الەۋمەتتىك اۋىرتپالىقتى تومەندەتۋگە سەپتىگىن تيگىزەتىن اتالمىش شارا دەر كەزىندە قابىلداندى. س. جاروۆا بۇدان وزگە دە يگى وزگەرىستەر بولىپ جاتقانىن اتاپ ءوتتى.
«ءارقاشان ءبارىنىڭ جاقسى بولاتىنىنا سەنگىڭ كەلەدى. بالالارىمىزدىڭ بولاشاعى جارقىن بولاتىنىنا سەنەمىز. ءبىز تۇراتىن قوسشى كەنتىندە جولدار جوندەلىپ، جارىق پەن سۋ قۇبىرلارى ورناتىلا باستادى»، - دەدى س. جاروۆا.
ايتا كەتەيىك، ق ر پرەزيدەنتى قاسىم-جومارت توقايەۆ «قازاقستان رەسپۋبليكاسى ازاماتتارىنىڭ بورىش جۇكتەمەسىن ازايتۋ شارالارى تۋرالى» جارلىققا قول قويدى. جارلىقتا ق ر ۇكىمەتىنە ەكىنشى دەڭگەيلى بانكتەردەگى جانە ميكروقارجى ۇيىمدارىنداعى كەپىلسىز تۇتىنۋشىلىق قارىزدارى وتەۋ بويىنشا ءبىرجولعى شارالار قابىلداۋعا تاپسىرما بەرىلدى.
اتالعان قارىزدار بويىنشا بورىشكەرلەر: كوپبالالى وتباسىلار، اسىراۋشىسىنان ايرىلۋ جاعدايىنا بايلانىستى تولەم الاتىن وتباسىلار، مۇگەدەك بالالارى بار، 18 جاستان اسقان، بالا جاسىنان مۇگەدەكتەر بار وتباسىلار، اتاۋلى مەملەكەتتىك الەۋمەتتىك كومەك الاتىندار، جەتىم بالالار، اتا-اناسىنان كامەلەتتىك جاسقا دەيىن ايىرىلعان، جيىرما توعىز جاسقا تولماعان، اتا-انانىڭ قامقورلىعىنسىز قالعان بالالار بولىپ وتىر.