قازاقستاندىق جاس بوكسشىلار گرۋزياداعى تۋرنيردەن ءۇش التىن ەنشىلەدى

نۇر-سۇلتان. قازاقپارات - گرۋزيادا بوكستان الەم جانە ەۋروپا چەمپيونى گەورگي كاندەلاكيدىڭ جۇلدەسى ءۇشىن وتكەن جاستار اراسىنداعى حالىقارالىق تۋرنير اياقتالدى.

اتالعان سىنعا قازاقستان، گرۋزيا، يرلانديا، تۇركيا، ازەربايجان مەن ارمەنيادان جۇزگە جۋىق سپورتشى قاتىستى دەپ جازادى Olympic.kz.

قازاقستان اتىنان ماڭعىستاۋ وبلىستىق بوكس مەكتەبىنىڭ بەس سپورتشىسى اتالعان تۋرنيردە باق سىنادى. نۇربەك ورىسبايەۆ (60 كەلى)، نۇراس جەڭىس (75 كەلى) جانە ابزال قۇلجان (91 كەلى) جارىس جەڭىمپازى اتانىپ، التىن مەدال يەلەندى.

ال 49 كەلىدەگى جارام قومشابايەۆ پەن 52 كەلىدەگى اتاقونىس امانگەلديەۆتىڭ ەنشىسىندە قولا مەدال بار.

«باسەكەلەستىك جوعارى بولعانىنا قاراماستان، ءبىزدىڭ بوكسشىلار جوعارى ناتيجە كورسەتتى. جەڭىسكە دەگەن جىگەرلەرى مۇقالعان جوق»، - دەيدى باپكەر جاراس قالىموۆ.