ارىستا قانشا جارىلىس بولدى - قورعانىس مينيسترلىگى
«ءارتۇرلى باعالاۋ بويىنشا 30 عا تارتا... ءبىراق، ول جەردە ەشكىم ناقتى ساناعان جوق. دەگەنمەن، ول جەردە قانشا وق-ءدارىنىڭ ساقتالعانىن ەسكەرە وتىرىپ، 40-50 دەن كەم بولمايتىن جارىلىستىڭ بولعانىن بولجاپ وتىرمىز»، - دەدى تيمۋر داندىبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
سپيكەردىڭ ايتۋىنا قاراعاندا، قازىرگى ۋاقىتتا ارىستاعى اپات ەلەمەنتتەرى بەينەلەنگەن ءارتۇرلى سيپاتتاعى اقپاراتتار لەگى اعىلۋدا.
«ول قويمادا ارتيللەريالىق وق-دارىلەر، رەاكتيۆتى وق-دارىلەر، بەلسەندى زىمىراندى سناريادتار مەن گراناتومەتتار ساقتالعان. 1-3 وق-ءدارىنىڭ ۇشۋ ۇزاقتىعى - ارتيللەريالىق نەمەسە گراناتومەتتىك بولسىن - 200 مەتردەي بولعان. ياعني، اسكەري ءبولىم اۋماعىن العان. تەك رەاكتيۆتى سناريادتار ۇشۋ ۇزاقتىعى جاعىنان 20 شاقىرىمعا دەيىن شىرقاپ كەتكەن. ءبىراق، ول سناريادتار جارىلماي، مەتالل زاتتار كۇيىندە جان- جاققا شاشىراعان. الايدا جەرگە تۇسكەن كەزدە ادامداردى جارالاپ، ءتىپتى ءولتىرىپ كەتۋگە ابدەن قاۋقارلى ەدى. ماسەلەن، قازا بولعان ازامات ءدال وسىنداي جارىلىستىڭ ەپيتسەنترىندە قالعان»، - دەدى سپيكەر.
ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. بۇعان دەيىن ءۇش ادام قازا تاپتى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي- جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.
تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق- ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي- اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى.
بۇگىنگى ۇكىمەت وتىرىسىندا پرەمەر- مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى.
ەۆاكۋاتسيالاۋ كەزىندە مىڭنان استام اتا- انا بالارىنان كوز جازىپ قالدى. قازىرگى ۋاقىتتا ولاردىڭ بارلىعى دا بالالارىمەن قاۋىشتى، بارلىعى ءدىن-امان.
فاكتى بويىنشا قىلمىستىق ءىس قوزعادى.
قالاداعى توتەنشە جاعداي جولاۋشىلار پويىزدارىنىڭ كەستەسىنە دە اسەر ەتتى.
25 -ماۋسىم، ساعات 12.00-دەگى جاعداي بويىنشا اسكەري ءبولىم اۋماعىندا جارىلىستار توقتادى. دەگەنمەن، وق-دارىلەر ساقتالاتىن قويمالاردىڭ اۋماعىندا بىقسىعان وتتىڭ وشاقتارى بايقالعاندىقتان، ق ر ىشكى ىستەر مينيسترلىگى جارىلىستاردىڭ قايتالانۋ قاۋپى ساقتالىپ وتىرعانىن ەسكەرتتى.
وسى ۋاقىتتا قر قورعانىس مينيسترلىگىنىڭ اسكەري-ينجەنەرلىك قىزمەتشىلەرى ارىس قالاسىن مينادان تازالاۋ جۇمىستارىن جۇرگىزىپ جاتىر. سناريادتاردىڭ دەنى تۇرعىن ءۇي القاپتارىنا تۇسكەن.
ارىس تۇرعىندارىنا كومەك قولىن سوزۋ ماقساتىندا ەلىمىزدە «ارىس، ءبىز بىرگەمىز» اكسياسى باستاۋ الدى.