سەناتور ارىس تۋرالى: جۋرناليستەر شىنايى اقپارات تاراتىڭىزدار
ارىستىقتاردىڭ جاي-كۇيىمەن تانىسۋ ءۇشىن ق ر پارلامەنتى سەناتىنىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ ءتوراعاسى مۇحتار قۇل-مۇحاممەد جانە قارجى جانە بيۋدجەت كوميتەتىنىڭ مۇشەسى ءالي بەكتايەۆ، قازاقستان رەسپۋبليكاسى پارلامەنتى سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ ءتوراعاسى اسقار بەيسەنبايەۆ، ەكونوميكالىق ساياسات، يننوۆاتسيالىق دامۋ جانە كاسىپكەرلىك تۇراقتى كوميتەتىنىڭ مۇشەسى ءالىمجان قۇرتايەۆ تۇركىستان وبلىسىنا ارنايى كەلدى.
ورداباسى اۋدانى، اقجول اۋىلى، جامبىل اتىنداعى ورتا مەكتەپتە ورنالاسقان ارنايى شتاب جۇمىسىمەن ءجىتى تانىسقان سەناتورلار توتەنشە جاعداي بويىنشا تىنباي جۇمىس اتقارىپ جۇرگەن ازاماتتارعا جوعارى باعا بەردى.
«جارىلىس بولعان ساتتەن جەدەل جۇمىس اتقارعان شتاب جۇمىسىن جوعارى باعالايمىن. ويتكەنى، ەڭ باسىندا ناقتى شەشىم قابىلدانباي، جۇمىس جۇيەلى جۇرمەسە، اپات سالدارى بۇدان دا اۋىر بولاتىن ەدى. ارىستاعى جاعداي ءالى دە قازاق حالقىنىڭ بەرەكە- بىرلىگىنىڭ بارىن كورسەتتى. قازىرگى كەزدە حالىقتى ۇرەيلەندىرەتىن، جالعان اقپارات كوپ تاراۋدا. وسى ورايدا، بارشاعا، جۋرناليستەر قاۋىمىنا شىنايى اقپارات تاراتىڭىزدار دەگەن تىلەك ايتقىم كەلەدى»، - دەدى م. قۇل-مۇحاممەد.
ارىستاعى اپات بارلىق قازاقستاندىقتاردى بەي-جاي قالدىرمادى دەگەن اسقار بەيسەنبايەۆ قايتىس بولعان ازاماتتاردىڭ وتباسىنا، اعايىندارىنا كوڭىل ايتىپ، شتاب جۇمىسىنىڭ جۇيەلى جۇرگىزىلىپ جاتقانىن اتاپ ءوتتى.
جامبىل اتىنداعى مەكتەپتەگى شتابتان سوڭ سەناتورلار ارىس قالاسىندا ورىن تەپكەن ەكىنشى شتاب جۇمىسىمەن تانىسۋعا بەت الدى.