ارىستا كوز جۇمعان ءۇشىنشى ادامنىڭ ارتىندا ايەلى مەن بالاسى قالدى
وبلىستىق قوعامدىق دەنساۋلىق باسقارماسىنىڭ باسپا ءسوز قىزمەتىنىڭ حابارلاۋىنشا، كوز جۇمعان جىگىت ابدىكۇل نۇرلان ۇلى احمەتوۆ ارىس قالاسىنىڭ تۇرعىنى. 1987 -جىلى تۋعان. ۇيلەنگەن بالاسى بار.
«ول سول جەردەگى اسكەري بولىمدە جۇمىس ىستەگەن. جارىلىس بولعان كەزدە ول اۋىر جاراقاتتانىپ، اۆياتسيالىق مەديتسينالىق قۇتقارۋ قىزمەتىمەن تۇركىستان وبلىستىق كلينيكالىق اۋرۋحاناسىنا جەتكىزىلگەن. ەس-ءتۇزسىز جاتقان ناۋقاسقا جانساقتاۋ بولىمىندە بارلىق قاجەتتى ساۋىقتىرۋ شارالارى جاسالدى. وكىنىشكە وراي، ول كوز جۇمدى»، - دەدى باسپا ءسوز حاتشىسى ميرا سۇيلەيمەنوۆا.
سونداي-اق، باسقارماسىنىڭ مالىمەتىنشە قازىرگى تاڭدا 74 ادام اۋرۋحانالاردا ەم قابىلداۋدا. ولاردىڭ 4 ەۋىنىڭ جاعدايى اۋىر دەپ باعالانۋدا. ارالارىندا كىشكەنتاي بالالار دا بار.
ەسكە سالساق، بۇعان دەيىن ارىستاعى جارىلىس سالدارىنان ءۇشىنشى ادامنىڭ قازا تاپقانى تۋرالى حابارلاعان بولاتىنبىز.