ەلباسى ارىستاعى جاعدايعا الاڭداۋشىلىق ءبىلدىردى
بۇل تۋرالى ق ر تۇڭعىش پرەزيدەنتىنىڭ باسپا ءسوز حاتشىسى ايدوس ۇكىباي ءمالىم ەتتى، دەپ حابارلايدى قازاقپارات.
«بۇگىنگى كۇندەرى بارلىق قازاقستاندىقتار ارىس قالاسىنىڭ تۇرعىندارىنىڭ قايعىسىن قاق ءبولىسىپ، الاڭداۋدا. نۇرسۇلتان نازاربايەۆ توتەن جاعدايدىڭ سالدارىنان زارداپ شەككەن ارىس تۇرعىندارىنىڭ تاعدىرىنا الاڭداپ وتىر»، - دەپ جازدى ق ر تۇڭعىش پرەزيدەنتىنىڭ باسپا ءسوز حاتشىسى ايدوس ۇكىباي twitter پاراقشاسىندا.
ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. اپات سالدارىنان ەكى ادام مەرت بولدى.
تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق- ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.
بۇگىنگى ۇكىمەت وتىرىسىندا پرەمەر- مينيستر اسقار مامين جارىلىس سالدارىنان كوز جۇمعانداردىڭ تۋعان- تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىندىگىنە ۋادە بەردى.
جالپى كەشەگى الاساپىران كەزدە مىڭداعان اتا-انا بالارىنان كوز جازىپ قالعان بولاتىن. قازىرگى ۋاقىتتا ولاردىڭ بارلىعى دا بالالارىمەن قاۋىشتى، بارلىعى ءدىن-امان.