سوعىس بولىپ جاتىر دەپ ويلادىق - ارىستاعى جارىلىستا كىندىك كەسكەن مۇعالىمنىڭ اڭگىمەسى
«ارىس قالاسىنا ءبىلىم جانە عىلىم مينيسترلىگىنىڭ وكىلى رەتىندە شاقىرىلىپ، ۇ ب ت اپپەلتسياسى وتىرىسىن وتكىزىپ جاتقان ەدىك. كوماندادا 12 ادام بولدى. وقىتۋشىلاردىڭ ءبارى دە ەلىمىزدىڭ ءاربىر قالاسىنداعى ج و و- لاردان جينالعان. 24 -ماۋسىم كۇنى مەكتەپ ىشىندە جۇمىسىمىزدى باستاپ جاتقانىمىزدا بىزگە «سىرتقا شىعىڭىزدار» دەگەن حابار كەلدى. العاشىندا ءمان بەرمەگەنىمىزبەن، قاتتى داۋىستان قورقىپ سىرتقا شىعۋعا تۋرا كەلدى. ابدىراپ سىرتقا شىقساق، اسپان اينالىپ جەرگە تۇسكەندەي، اينالانىڭ ءبارى شۋىلداپ كەتكەن. سوعىس بوپ جاتىر دەپ ويلادىق»، - دەيدى بالبوپە وتەنوۆا ءبىلىم جانە عىلىم ءمينيسترى اسحات ايماعامبەتوۆتىڭ ماراپاتى كەزىندە.
اتىراۋداعى مۇناي-گاز ۋنيۆەرسيتەتىندە ساباق بەرەتىن مۇعالىمنىڭ ايتۋىنا قاراعاندا، اۋىل مۇعالىمدەرى مينيسترلىكتىڭ وكىلدەرىنە جول كورسەتىپ، الىس ەلدىمەكەنگە باعىتتاپ جىبەرگەن.
«جان-جاققا ءبولىنىپ كەتتىك. ءبىر كەزدە جانات، شايزا ۇشەۋىمىز عانا قالىپپىز. ءدال ون-اق مەتر جەرگە كەلىپ سنارياد ءتۇستى. ءبىز قايدا تىعىلارىمىزدى بىلمەي، ۇيلەردەن جەرتولە دە سۇرادىق. سويتسەك، ول ۇيلەردىڭ وتباسىلارى دا قاشۋعا قامدانىپ جاتىر ەكەن. اقىرى، ءبارىمىز بولىپ، قىرعا قاراي جۇگىردىك. ارتىمىزدان تارسىلداعان جارقىنشاقتار ءتۇسىپ جاتىر. قولىما تەلەفونىمدى الىپ جولداسىما «ەكى قىزىما يە بول» دەگەننەن باسقا ەشتەڭە ايتا المادىم»، - دەيدى بالبوپە وتەنوۆا.
ارىستاعى اپاتتان جاياۋ دا، كولىكپەن دە قاشقان جۇرتتىڭ ورتاسىندا قالعان ءۇش مۇعالىمگە ءبىر كولىك كەزدەسىپتى. ىشىندەگى جاس جىگىت ءوزىن دوسمۇحامبەت دەگەن ارىستاعى ۇ ق ك قىزمەتكەرىمىن دەپ تانىستىرىپ، مۇعالىمدەردى الا كەتكەن.
«جولدا سىيعانشا بالالاردى دا الا كەتتىك. ءتورت بالاسى بار ءبىر كەلىنشەكتى جانە اجەيدى وتىرعىزىپ الدىق. الگى ايەلدىڭ ەڭ كىشكەنتاي بالاسى ءبىر ايلىق ءسابي ەكەن. ءبىر قىر اسقاننان كەيىن بەنزينى ءبىتىپ قالعان ءبىر كولىكتەن اياعى اۋىر كەلىنشەك ءتۇسىپ جاتىر ەكەن. ءبارىمىز اياعى اۋىر كەلىنشەكتى كولىكتىڭ الدىنا اكۋشەرىمەن بىرگە وتىرعىزىپ الىپ، جاقىن ماڭنان اۋرۋحاناعا ىزدەدىك. اۋرۋحانالاردىڭ بارلىعى بوس قالعان ەكەن. كەلىنشەكتىڭ تولعاعى ودان سايىن جيىلەي بەردى. كولىك ىشىندە بوساندىرىپ الامىز دەپ تە ويلادىق. جۇرگىزۋشى جىگىتتىڭ قايسارلىعى مەن پىسىقتىعنىڭ ارقاسىندا اقجار دەگەن اۋىلعا كەلدىك»، - دەيدى ول.
شەتتەگى ءبىر ۇيگە توقتاعان مۇعالىمدەر ءۇي يەسىمەن كەلىسىپ، كەلىنشەكتى بوساندىرۋعا ءبىر بولمەنى بولەدى.
«ءبىزدىڭ باعىمىزعا قاراي سول ءۇي - مەيىرىمدى گۇلميرا دەگەن اپايدىڭ وتباسى ەكەن. جاعدايىمىزدى ايتىپ ەدىك، بىزگە ءبىر بولمەنى ۇيىمداستىرىپ بەردى. توسەگىمىزدى دايىندادى. ۇشەۋىمىز دە بوساندىرىپ كورمەپپىز. اكۋشەرگە كومەكتەستىك. كەلىنشەكتىڭ بوسانۋىنا كومەكتەستىك. نارەستەنىڭ كىندىگى موينىنا ورالىپ قالىپتى، ابىروي بولعاندا اكۋشەردىڭ بىلىكتىلىگىنىڭ ارقاسىندا نارەستە امان-ەسەن دۇنيەگە كەلدى»، - دەيدى بالبوپە وتەنوۆا.
23 جاستاعى كەنجە دەگەن كەلىنشەك وسىلايشا ەكىنشى ءسابيىن ومىرگە اكەلدى. ول 24 -ماۋسىم كۇنى تولعاعى باستالىپ، ارىستىڭ اۋرۋحاناسىنا تۇسكەن ەكەن.
«اكۋشەر ەكەۋى قاشىپ-پىسىپ جۇگىرىپ ءبىرشاما شاقىرىمدى باسىپ وتكەن. كەنجە سنارياد جارىلعان سايىن جەرگە وتىرىپ قالىپ، قاتتى قينالىپتى. اللانىڭ قالاۋىمەن وسىلايشا، بالانىڭ كىندىگىن كەسىپ، كىندىكشەشە اتانىپ وتىرمىن. ءوزىمنىڭ ەكى قىزىم بار. ومىرگە كەلگەن كاميلا ءۇشىنشى قىزىم بولدى. اماندىعىن تىلەيمىن. ءسابيدىڭ اتىن ءبىزدى اقجار اۋىلىنا الىپ كەلگەن دوسمۇحامبەتتىڭ اناسىنىڭ اتىنا قۇرمەت رەتىندە قويدىق»، - دەيدى بالبوپە وتەنوۆا.
كىندىكشەشە اتانعان بالبوپە قازىرگى ۋاقىتتا كەنجەمەن تەلەفون ارقىلى بايلانىس حابارلاسىپ تۇرادى.
«كەنجەنىڭ دە، قىزىمىز كاميلانىڭ جاعدايى جاقسى. ءبىز ارەكەتىمىزدى ەرلىك دەپ ەسەپتەمەيمىز. قۇدايعا شۇكىر، كومانداداعى 12 ادامنىڭ ءبارى امان-ەسەن شىمكەنتكە جەتىپتى»، - دەدى ول.
ەسكە سالا كەتسەك، ءبىلىم جانە عىلىم ءمينيسترى اسحات ايماعامبەتوۆ ارىستاعى جارىلىس كەزىندە جاس انانى بوساندىرىپ العان مۇعالىمدەردى ماراپاتتادى. شايزا دوسكەيەۆا، بالبوپە وتەنوۆا، جانات نۇرجۇمانوۆا - مينيسترلىكتىڭ اتىنان ءدال وسى ءۇش مۇعالىم ارىستا جارىلىس بولعان كەزدە مەكتەپتە ۇ ب ت-نىڭ اپەللياتسيا وتىرىسىن وتكىزىپ جاتقان بولاتىن.
ءبىلىم جانە عىلىم ءمينيسترى اسحات ايماعامبەتوۆ ارىستاعى جارىلىس كەزىندە جاس انانى بوساندىرىپ العان مۇعالىمدەردى ماراپاتتادى.
اۆتورى: ايان بەكەن ۇلى