ارىستاعى جارىلىس سالدارىنان ءۇشىنشى ادامنىڭ قازا تاپقانى بەلگىلى بولدى
بۇل تۋرالى ق ر ءى ءى م توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ ايتتى، دەپ حابارلايدى قازاقپارات ءتىلشىسى.
«تۇركىستان وبلىستىق دەنساۋلىق ساقتاۋ باسقارماسىنىڭ مالىمەتتەرىنە سايكەس، مەديتسينالىق كومەككە 70 ادام جۇگىنىپ، ونىڭ 45 ى اۋرۋحاناعا جاتقىزىلدى. 3 ادام قازا تاپتى. ارىس قالاسىنان جالپى 3500 دەن استام ادام ەۆاكۋاتسيالاندى. شىمكەنت قالاسى مەن تۇركىستان وبلىسى اۋداندارىنداعى ەۆاكۋاتسيالىق پۋنكتەرگە 1700 ادام ورنالاستىرىلعان. تاۋلىك بويى جۇمىس ىستەپ تۇرعان قاۋىرت جەلىگە بۇكىل رەسپۋبليكادان 13 مىڭ 490 قوڭىراۋ كەلىپ ءتۇستى»، - دەدى ول.
26 -ماۋسىم كۇنى تاڭعى ساعات 06.00-دەگى جاعداي بويىنشا، توتەنشە جاعدايدى جانە ونىڭ سالدارىن جويۋ ورنىندا ءىىم كۇشتەرى مەن قۇرالدارى توبىنان جەكە قۇرامنىڭ 1251 مامانى مەن 188 تەحنيكاسى شوعىرلاندىرىلعان.
«ونىڭ ىشىندە ازاماتتىق قورعانىس ورگاندارىنىڭ 346 مامانى مەن 48 تەحنيكاسى، پوليتسيانىڭ 358 قىزمەتكەرى مەن 75 تەحنيكاسى، ۇلتتىق ۇلاننىڭ 547 اسكەري قىزمەتشىسى مەن 65 تەحنيكاسى بار»، - دەدى ول.
ونىڭ اتاپ وتۋىنشە، ارىس قالاسىنىڭ اۋماعىندا توتەشە جاعدايلار كوميتەتىنىڭ ءورت ءسوندىرۋ قىزمەتىنىڭ كۇشىمەن 52، ونىڭ ىشىندە ءبىر ءدامحانا عيماراتى، 24 تۇرعىن ءۇي، 10 قورا- قوپسى جانە 17 تابيعي ءورت سوندىرىلگەن.
«تۇركىستان وبلىستىق پوليتسيا دەپارتامەنتىنىڭ، ۇلتتىق ۇلاننىڭ قىزمەتكەرلەرى ارىس قالاسىن قورشاۋعا الۋ جانە شولعىنداۋ شارالارىن جۇزەگە اسىرىپ جاتىر. قالا توڭىرەگىندە بەكەتتەر دە قويىلعان. وبلىستىق پوليتسيا دەپارتامەنتىنىڭ قىزمەتكەرلەرى ءۇش توناۋ فاكتىسىنىڭ الدىن الدى»، - دەدى رەسمي وكىل.
ن. نۇراحمەتوۆتىڭ دەرەگىنشە، قورعانىس مينيسترلىگى ۇشقىشسىز ۇشاتىن اپپاراتتاردى قولدانۋ ارقىلى جۇرگىزگەن اەروۆيزۋالدى بارلاۋ ناتيجەسىندە اسكەري ءبولىم اۋماعىندا بىقسىعان وتتىڭ 3 وشاعى انىقتالعان. اتالعان مينيسترلىكتىڭ 145 ماماننان جاساقتالعان 14 ساپەرلەر توبى ارىس قالاسىنىڭ اۋماعىن، تەمىرجول بويى مەن ستانسا ماڭىن، اسكەري ءبولىم ماڭايىن جارىلماي قالعان وق-دارىلەردەن تازالاۋ جۇمىستارىن جۇرگىزىپ جاتىر. جارىلماي قالعان 24 سنارياد تابىلدى جانە ولار ارنايى تەحنيكامەن قاۋىپسىز ايماققا شىعارىلاتىن بولادى.