پارلامەنت دەپۋتاتتارى حالىقپەن كەزدەسۋ ءۇشىن ارىسقا اتتاندى - نۇرلان نىعماتۋلين

نۇر-سۇلتان. قازاقپارات - پارلامەنت دەپۋتاتتارى ارىس تۇرعىندارىمەن كەزدەسۋ ءۇشىن تۇركىستان وبلىسىنا اتتاندى.

بۇل تۋرالى ءماجىلىس ءتوراعاسى نۇرلان نىعماتۋلين ايتتى، دەپ حابارلايدى قازاقپارات ءتىلشىسى.

«بارلىق دەپۋتاتتىق كورپۋس اتىنان ارىس قالاسىنداعى توتەنشە جاعداي سالدارىنان قازا بولعانداردىڭ وتباسىلارىنا قايعىرا كوڭىل ايتامىز. سونىمەن بىرگە، زارداپ شەككەندەردىڭ تەزىرەك جازىلىپ كەتۋىن تىلەيمىز. بارشاڭىزعا بەلگىلى، وسى كۇندەرى بۇكىل قازاقستاندىقتار ءبىر ەل بولىپ ارىس تۇرعىندارىنا قولدان كەلگەن كومەكتى كورسەتۋدە. سونىڭ ىشىندە ءماجىلىس دەپۋتاتتارى دا ءبىرىنشى كۇننەن باستاپ وسى وقيعادان تىس قالعان جوق»، - دەدى ن. نىعماتۋلين بۇگىن ءماجىلىستىڭ جالپى وتىرىسىندا.

وسى ورايدا ول دەپۋتاتتار وزدەرىنىڭ ءبىر كۇندىك جالاقىسىن ارنايى كومەك كورسەتۋ قورىنا اۋدارعانىن جەتكىزدى.

«ال كەشەدەن باستاپ ءبىر توپ دەپۋتاتتارىمىز حالىقپەن كەزدەسۋ ءۇشىن ارىس قالاسىنا جول ءجۇرىپ كەتتى. بارشامىز ارىس قالاسىنىڭ تەزىرەك قالپىنا كەلىپ، تۇرعىندار جاعدايىنىڭ تەزىرەك جاقسارۋىن تىلەيمىز. ارىس، ءبىز بىرگەمىز!»، - دەدى ءماجىلىس ءتوراعاسى.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24 -ماۋسىم كۇنى تاڭەرتەڭ جارىلىس بولدى. اپات سالدارىنان ەكى ادام مەرت بولدى. 170 كە جۋىق ادام زارداپ شەكتى. 20 عا جۋىق ءۇي، 9 قورا-قوپسى جانىپ، دالالى اۋماقتا 14 وشاق تۇتاندى. ءۇي-جايلار مەن عيماراتتاردىڭ 80-90 پايىزىنا ءارتۇرلى دەڭگەيدە زاقىم كەلدى. ءبىرقاتار وڭىردە شۇعىل جەلىلەر قۇرىلدى.

تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى. سونداي-اق ەلباسى نۇرسۇلتان نازاربايەۆ ارىستاعى جاعدايعا الاڭداۋشىلىق ءبىلدىردى.

بۇگىنگى ۇكىمەت وتىرىسىندا پرەمەر-مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىنىن ايتتى.

ەۆاكۋاتسيالاۋ كەزىندە مىڭنان استام اتا-انا بالارىنان كوز جازىپ قالدى. قازىرگى ۋاقىتتا ولاردىڭ بارلىعى دا بالالارىمەن قاۋىشتى، بارلىعى ءدىن-امان.

فاكتى بويىنشا قىلمىستىق ءىس قوزعادى.

قالاداعى توتەنشە جاعداي جولاۋشىلار پويىزدارىنىڭ كەستەسىنە دە اسەر ەتتى.

25 -ماۋسىم، ساعات 12.00 دەگى جاعداي بويىنشا اسكەري ءبولىم اۋماعىندا جارىلىستار توقتادى. دەگەنمەن، وق-دارىلەر ساقتالاتىن قويمالاردىڭ اۋماعىندا بىقسىعان وتتىڭ وشاقتارى بايقالعاندىقتان، ق ر ىشكى ىستەر مينيسترلىگى جارىلىستاردىڭ قايتالانۋ قاۋپى ساقتالىپ وتىرعانىن ەسكەرتتى.

وسى ۋاقىتتا ق ر قورعانىس مينيسترلىگىنىڭ اسكەري-ينجەنەرلىك قىزمەتشىلەرى ارىس قالاسىن مينادان تازالاۋ جۇمىستارىن جۇرگىزىپ جاتىر. سناريادتاردىڭ دەنى تۇرعىن ءۇي القاپتارىنا تۇسكەن.

ارىس تۇرعىندارىنا كومەك قولىن سوزۋ ماقساتىندا ەلىمىزدە «ارىس، ءبىز بىرگەمىز» اكسياسى باستاۋ الدى.