قازاقستاندىق داڭقتى بالۋان سايلاۋ مۇقاشەۆ ومىردەن وزدى

ورال. قازاقپارات - قازاقستاندىق داڭقتى بالۋان سايلاۋ مۇقاشەۆ ومىردەن وزدى، دەپ حابارلايدى قازاقپارات ءتىلشىسى.

ەركىن كۇرەس شەبەرى سايلاۋ مۇقاشەۆ كەڭەس وداعى تۇسىندا كوپتەگەن تابىستارعا قول جەتكىزدى.

1950 -جىلى 1 -جەلتوقساندا بۇرىنعى چاپايەۆ اۋدانى لەنين اتىنداعى كولحوزدا دۇنيەگە كەلگەن سايلاۋ مۇقاشەۆ جاسىنان دومبىرا ۇيرەنىپ، ءان-جىرعا قۇمار بولىپ ءوستى. دەگەنمەن پەرۆوماي ورتا مەكتەبىنىڭ 9-سىنىبىندا وقىپ جۇرگەندە، اۋىلعا كەلگەن سول كەزدەگى جاس مامان، كەيىن قازاقستاننىڭ ەڭبەك سىڭىرگەن جاتتىقتىرۋشىسى اتانعان قامەش يسماعۇلوۆتىڭ كوزىنە ءتۇسىپ، كۇرەسكە بەت بۇردى.

مەكتەپ ءبىتىرىپ، پاۆلودار يندۋستريالىق ينستيتۋتىنا تۇسكەن جاس جىگىت قازاقستاننىڭ ەڭبەك سىڭىرگەن جاتتىقتىرۋشىسى لۇعات وتەشەۆتىڭ قولاستىندا جاتتىقتى. اسا جەڭىل سالماقتا كۇرەسىپ، 1970 -جىلى ەرەسەكتەر اراسىندا قازاقستان چەمپيونى اتانعان سايلاۋ مۇقاشەۆ بۇكىلوداقتىق جارىستاردا دا توپ جارا باستادى. اسىرەسە، 1973 جانە 1974 -جىلدارى كىشى الەم چەمپيوناتىمەن تەڭ سانالاتىن ءالي اليەۆ اتىنداعى حالىقارالىق جارىستىڭ ەكى مارتە جەڭىمپازى اتاندى. ك س ر و چەمپيوناتىنىڭ قولا جۇلدەگەرى (1973) اتانۋمەن بىرگە بۇكىلوداقتىق جازعى اۋىل ويىندارىندا بىرنەشە دۇركىن ەشكىمگە جەڭىستىك بەرمەدى.

اتاقتى بالۋاندار ابىلسەيىت ايحانوۆ، امانجول بۇعىبايەۆتارمەن بىرگە جۇرگەن سايلاۋ مۇقاشەۆقا دا كسرو قۇراماسىنىڭ باپكەرلەرى قىرىن قاراپ، ونى ك س ر و - يران، ك س ر و - ا ق ش، ك س ر و - ءۇندىستان باسەكەلەرىنە قاتىستىرعانىمەن، الەم، ەۋروپا چەمپيوناتى سىندى ءىرى جارىستارعا اپارمادى. ال سول شەتەلدەگى ءتۇرلى جارىستاردان جەڭىپ كەلگەندەردىڭ تالايىن س. مۇقاشەۆ ۇتىپ ءجۇردى. سايلاۋ مۇقاشەۆتىڭ ەكى رەت تاجىكستان چەمپيونى اتانعانى دا بار.

1979 -جىلى الماتى دەنە شىنىقتىرۋ ينستيتۋتىن ءتامامداعاننان كەيىن ورالعا ورالعان سايلاۋ مۇقاشەۆ باتىس قازاقستان اۋىل شارۋاشىلىعى ينستيتۋتىندا باپكەرلىك قىزمەت اتقارىپ، كوپتەگەن شاكىرتتەر تاربيەلەدى.

سوڭعى جىلدارى سايلاۋ مۇقاشەۆتىڭ جۇلدەسى ەركىن كۇرەستەن رەسپۋبليكالىق تۋرنير ۇيىمداستىرىلىپ كەلەدى.

سايلاۋ مۇقاشەۆ تۋرالى وچەرك 1996 -جىلى جارىق كورگەن «قازاق بالۋاندارى» اتتى تاريحي- دەرەكتى باسىلىمعا ەنگىزىلدى.

ۇزاققا سوزىلعان اۋىر ناۋقاستان كەيىن سپورت مايتالمانى 25 -ماۋسىم كۇنى دۇنيە سالدى.

كۇرەس الەمىندە ارتىندا وشپەستەي ءىز قالدىرعان مارقۇم 27 -ماۋسىم كۇنى جەرلەنەدى.