ەلوردالىقتار ارىس تۇرعىندارىنا كومەكتەسۋگە جۇمىلىپ جاتىر

نۇر-سۇلتان. قازاقپارات - ەلوردا اكىمدىگىنىڭ قىزمەتكەرلەرى، قالالىق مەكەمەلەر، كاسىپورىندار «ارىس، ءبىز بىرگەمىز!» اتتى جالپى رەسپۋبليكالىق اكسياعا قولداۋ كورسەتۋدە.

ولار وزدەرىنىڭ ءبىر كۇندىك جالاقىلارىن ارىس قالاسىنىڭ زارداپ شەككەن تۇرعىندارىنا اۋدارادى، دەپ حابارلايدى قازاقپارات ءتىلشىسى نۇر-سۇلتان اكىمدىگىنە سىلتەمە جاساپ.

ەلوردا اكىمدىگى ارىس قالاسىنىڭ 500 بالاسىن بارلىق قاجەتتى زاتتارمەن، كيىممەن، اياق كيىممەن، مەكتەپكە قاجەت قۇرال-جابدىقتارمەن قامتاماسىز ەتىپ، ءبىر ايعا جازعى لاگەرگە جىبەرەدى. قالانىڭ زارداپ شەككەن تاعى 1000 بالاسىنا جازعى دەمالىستى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتى ۇيىمداستىرادى.

اكسيا اياسىندا زارداپ شەككەندەرگە نۇر-سۇلتان قالاسىنىڭ كاسىپكەرلەرى مەن مەتسەناتتارى ازىق-تۇلىكپەن گۋمانيتارلىق كومەك كورسەتەدى. بۇدان بولەك، ەلوردانىڭ 5 نۇكتەسىندە زارداپ شەككەندەر ءۇشىن قاجەتتى زاتتاردى قابىلداۋ پۋنكتى اشىلادى. تۇرعىن ۇيلەر مەن باسقا دا ينفراقۇرىلىم نىساندارىن قالپىنا كەلتىرۋ ءۇشىن نۇر-سۇلتاننان ارىس قالاسىنا قۇرىلىس بريگادالارى مەن قاجەتتى قۇرىلىس ماتەريالدارىنىڭ كەرۋەندەرى جىبەرىلەدى.

سونىمەن قاتار، «قازاقستان مەديتسينا جاستارى» قوعامدىق ۇيىمى زارداپ شەككەن تۇرعىندارعا العاشقى مەديتسينالىق كومەك كورسەتۋ ءۇشىن مەديتسينالىق وقۋ ورىندارىنىڭ ستۋدەنتتەرى مەن مەديتسينا قىزمەتكەرلەرى اراسىنان ەرىكتىلەردى جيناپ جاتىر.

ارىس قالاسىنا 30-40 ەرىكتى جىبەرۋ جوسپارلانعان. مىنا مەكەن جايلاردا قاجەتتى زاتاردى قابىلداۋ پۋنكتەرى ورنالاسادى: - رەسپۋبليكا داڭعىلى، 34، «جاستار» سارايى، 3-قابات، 306№ كابينەت، بايلانىس تەلەفونى: 87755136441؛ - تاۋەلسىزدىك داڭعىلى، 3، «نۇر وتان» پارتياسى ەلوردالىق فيلالىنىڭ عيماراتى، 405№ كابينەت، بايلانىس تەلەفونى: 87759500298؛ - جەڭىس داڭعىلى، 62، ساكەن سەيفۋللين اتىنداعى قازاق اگروتەحنيكالىق ۋنيۆەرسيتەتى، بايلانىس تەلەفونى: 481910.