ارىستاعى وق-ءدارى قويماسىندا جارىلىستار توقتادى - ق ر ءى ءى م
بۇل تۋرالى بۇگىن ورتالىق كوممۋنكاتسيالار قىزمەتىندەگى بريفينگتە ق ر ىشكى ىستەر ءمينيسترىنىڭ ورىنباسارى يۋري يلين ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا قورعانىس مينيسترلىگى ۇشقىشسىز باسقارىلاتىن ۇشۋ اپپاراتىنىڭ كومەگىمەن اەروۆيزالدى ۇشۋلارىن جۇرگىزدى. وق-ءدارى ساقتالاتىن قويمالاردىڭ اۋماعىندا بىقسىعان وتتىڭ 9 وشاعى تابىلدى. ياعني، ازىرشە قايتادان جارىلىستاردىڭ ورىن الۋ قاۋپى ساقتالۋدا. دەگەنمەن، باستاپقى ۋاقىتتا ورىن العان جارىلىستارداي جارىلىس بولمايدى دەپ ويلايمىن»، - دەدى ول.
سونىمەن قاتار، يۋري يلين ەلىمىزدىڭ قورعانىس مينيسترلىگى ارىس قالاسىنىڭ اۋماعىن جارىلماي قالعان وق-دارىلەردەن تازارتۋ ءۇشىن ارنايى ساپەرلەر توبىن قۇرعانىن ايتتى.
«اتالعان ارنايى توپتىڭ 100 دەن استام ادامنان جاساقتالعان ءبىر توبى تەمىر جول ستانساسىندا، تەمىر جول بويىندا جۇمىس ىستەپ جاتىر. ال قالعاندارى ەلدى مەكەندەردىڭ جانە اسكەري بولىمشەنىڭ اۋماعىندا جۇمىس ىستەۋدە. ال قويمالارداعى ءورت سالدارىن جويۋ جانە وتتى ءسوندىرۋ جۇمىستارىنا، مەنىڭشە، بۇگىنگى كۇننىڭ ىشىندە ءورت ءسوندىرۋ قۇرالدارىمەن جابدىقتالعان ارنايى ساۋىتتى تەحنيكالار كىرىسەتىن بولادى»، - دەدى ۆيتسە-مينيستر.