قازاقپەن بىرگە بۇكىل تۇركى الەمى رۋحاني جاڭعىرىپ جاتىر - تۇرىك عالىمى

نۇر-سۇلتان. قازاقپارات - تۇركيا عالىمى ءحۇليا كاساپوگلۋ چەنگەل قازاقستانداعى «رۋحاني جاڭعىرۋ» باعدارلاماسى بۇكىل تۇركى الەمىنە اسەرىن تيگىزىپ جاتقانىن ايتتى، دەپ حابارلايدى قازاقپارات ءتىلشىسى.

تۇرىك ءتىل قۇرىمى عىلىمي كەڭەسىنىڭ مۇشەسى ءحۇليا كاساپوگلۋ چەنگەل باۋىرلاس تىلدەردىڭ تەرمينولوگياسىن بىرىزدەندىرۋگە كۇش سالىپ جاتقان حالىقارالىق تۇركى اكادەمياسىنىڭ باستاماسىن جوعارى باعالادى.

«حالىقارالىق تۇركى اكادەمياسى - تۇركى الەمىنىڭ ورتالىعى. شىن مانىندە وسىلاي بولىپ وتىر. ەلدەرىڭىزدە «رۋحاني جاڭعىرۋ» دەگەن باعدارلاما اياسىندا كوپتەگەن ىستەر جاسالىپ جاتىر. تەرميندەردى تارتىپكە كەلتىرۋ باستاماسى سونىڭ ءبىر پاراسى عانا. وسىنىڭ ارقاسىندا قازاقستان عانا ەمەس، بۇكىل تۇركى الەمى جاڭعىرىپ جاتقانداي. تاۋەلسىزدىكتەرىڭىزگە 27 جىل بولدى. مۇنى تۇركى الەمىنىڭ تاۋەلسىزدىك العان كەزەڭى دەپ ايتۋعا بولادى. 30 جىل بۇرىن وسى قازاقستاندىق عالىمدارمەن العاش كەزدەسىپ، تەرمينولوگيا ماسەلەلەرىن تالقىلادىق. ول كەزدە اۋدارماشىلار ارقىلى سويلەسۋشى ەدىك. قازىر اۋدارماسىز سويلەسە الاتىن دەڭگەيگە جەتتىك. بۇل 27 جىلدىڭ باستى يگىلىگى»، - دەدى پروفەسسور.

تۇركيالىق عالىم تۇركى الەمىن ءتىل، تاريح جانە ادەبيەت بىرىكتىرەتىنىن اتادى.

«عالىم يسمايل گاسپارالىنىڭ وتكەن عاسىردىڭ باسىندا ايتقان سوزدەرى ءالى كۇنگە دەيىن وزەكتى. تاريحي مۇرامىز ورتاق ەلدەرمىز. ءتىل دە، تاريح تا، ادەبيەت تە ورتاق. ⅩⅩ عاسىرعا دەيىن ورتاق ادەبيەتىمىز بار ەدى. ءالىپبي ورتاق بولعان كەزدە ءبىزدىڭ عالىمدار اۋدارماسىز-اق ءبىر-ءبىرىن وقىپ، تۇسىنە الاتىن ەدى. سوندىقتان ءبىرىزدى ءالىپبي قالىپتاستىرۋ ماسەلەسىن ءتۇبى ءبىر شەشۋىمىز كەرەك. ءبىراق مەن ورتاق ءتىل دەگەنگە سەنبەيمىن. وندايدى ۇسىنۋشىلار دا بار. ءالىپبيىمىز ورتاق بولسا دا از جەتىستىك ەمەس»، - دەدى عالىم.