جارىلىستارعا قاراماستان، ارىستاعى اسكەريلەر ءورتتى ءسوندىرۋدى جالعاستىرا بەرگەن

None
None
نۇر-سۇلتان. قازاقپارات - ارىستاعى جارىلىس كەزىندە اسكەريلەر ءوز كۇشىمەن ەكى تەحنيكالىق اۋماقتى ءسوندىرىپ ۇلگەرگەن، دەپ حابارلايدى قازاقپارات ءتىلشىسى.

«جارىلىس بولعان اسكەري بولىمدە نەگىزىنەن كەلىسىمشارت بويىنشا اسكەري قىزمەتشىلەر مەن باسقارۋشى وفيتسەرلەر بولعان. ءدال وقيعا كەزىندە جارىلىستىڭ باستالعانىنا قاراماستان، اسكەري قىزمەتشىلەر ءوز كۇشىمەن ءورتتى سوندىرە بەرگەن. ولار تانك بازاسىنداعى شىنجىر تاباندى تەحنيكانى، ەكىنشى جانە ءۇشىنشى تەحنيكالىق اۋماقتى ءسوندىرىپ ۇلگەرگەن. ءوز كۇشىمەن! قازىرگى ۋاقىتتا 500 ساپەر وقيعانىڭ سالدارىن جويۋعا كۇش سالىپ جاتىر. 50 گە تارتا تەحنيكا جۇمىلدىرىلدى. ەڭ ءبىرىنشى كەزەكتە، ارىستىڭ تۇرعىلىقتى ەلدى مەكەندەرىندەگى وق-دارىلەردى ميناسىزداندىرۋ جۇمىستارى جۇرگىزىلىپ جاتىر»، - دەدى قورعانىس ءمينيسترىنىڭ ءبىرىنشى ورىنباسارى مۇرات بەكتانوۆ ۇكىمەت وتىرىسىنان كەيىن تىلشىلەردىڭ سۇراعىنا جاۋاپ بەرە وتىرىپ.

ونىڭ ايتۋىنشا، بارلاۋ جۇمىستارىن جۇرگىزۋ ماقساتىندا 1800 مامان جۇمىلدىرىلعان.

ەسكە سالا كەتسەك، ارىس قالاسىنداعى اسكەري ءبولىمنىڭ قويماسىندا 24- ماۋسىم كۇنى تاڭەرتەڭ جارىلىس بولدى. اپات سالدارىنان ەكى ادام مەرت بولدى. تۇركىستان وبلىسىنا ارنايى بارعان قازاقستان پرەزيدەنتى قاسىم-جومارت توقايەۆ ارىستاعى اسكەري بولىمشەدەگى وق-ءدارى قويماسىنداعى جارىلىستان زارداپ شەككەن قالا تۇرعىندارىمەن كەزدەسىپ، قالانىڭ قالپىنا كەلتىرىلەتىنىنە ۋادە بەردى.

بۇگىنگى ۇكىمەت وتىرىسىندا پرەمەر-مينيستر اسقار مامين جارىلىس سالدارىنان كوز جۇمعانداردىڭ تۋعان-تۋىستارىنا كوڭىل ايتىپ، تۇرعىندارعا بارلىق كومەك كورسەتىلەتىندىگىنە ۋادە بەردى.

جالپى كەشەگى الاساپىران كەزدە مىڭداعان اتا-انا بالارىنان كوز جازىپ قالعان بولاتىن. قازىرگى ۋاقىتتا ولاردىڭ بارلىعى دا بالالارىمەن قاۋىشتى، بارلىعى ءدىن-امان.

سوڭعى جاڭالىقتار