حالىقارالىق «قازاقپارات» ۇجىمى ارىس تۇرعىندارىنا ەكى كۇندىك جالاقىسىن اۋدارادى
ايتا كەتەيىك، «قازاقپارات» وسىعان دەيىن تۇركىستان وبلىسىنىڭ ارىس قالاسىنداعى اسكەري ءبولىمنىڭ قويماسىندا جارىلىس بولعاندىعىن حابارلادى.
وقيعا ورنىنا شۇعىل تۇردە مەملەكەت باسشىسى قاسىم-جومارت توقايەۆ جەتىپ، جارىلىس اۋماعىنان ەۆاكۋاتسيالانعان تۇرعىندارمەن كەزدەستى.
ق ر پرەزيدەنتى «قالا قالپىنا كەلتىرىلەدى، ءبارى دۇرىس بولادى. بۇل توتەنشە جاعداي، اپات. قايتەمىز، كەيبىر ۋاقىتتا سولاي بولادى. ۇكىمەت اقشا، قاراجات بەرەدى، كومەكتەسەدى، الاڭداماڭىزدار! ءبارى جاقسى بولادى. جوندەۋ جۇمىستارىن جاساپ بەرەمىز. ۇكىمەت قانشا قاراجات كەرەك ەكەنىن سانايدى. سودان كەيىن قاراجات بولەمىز. ءبارىن ءتۇسىنىپ وتىرمىن، ءبارى جاقسى بولادى. ادەيى كەلىپ وتىرمىن»، - دەدى مەملەكەت باسشىسى تۇرعىندارمەن كەزدەسۋى بارىسىندا.
سونداي-اق پرەزيدەنت ارىس تۇرعىندارىنا بارلىق وبلىس، ەڭ الدىمەن ۇكىمەت كومەكتەسەتىنىن ايتتى.
«مەنىڭ تاپسىرمام بويىنشا بارلىق وبلىس، ەڭ الدىمەن ۇكىمەت كومەكتەسەتىن بولادى. ءسال-ءسال شىداڭىزدار، ءبارى دۇرىس بولادى. بۇل ماسەلەلەردىڭ بارلىعىن جەكە ءوزىمنىڭ باقىلاۋىما الامىن»، - دەدى قاسىم-جومارت توقايەۆ.
بولعان وقيعاعا بايلانىستى ارىستاعى جارىلىستان زارداپ شەككەندەرگە كومەك قولىن سوزۋ ماقساتىندا ەلىمىزدە «ارىس، ءبىز بىرگەمىز» اكسياسى باستالدى.
اكسيا اياسىندا مادەنيەت جانە سپورت مينيسترلىگى، ەڭبەك جانە حالىقتى الەۋمەتتىك قورعاۋ مينيسترلىگىنىڭ قىزمەتكەرلەرى ءبىر كۇندىك جالاقىسىن اۋداراتىن بولدى. وسى باستاماعا دەپۋتاتتار دا قوسىلعان. ەندى مىنە، ورتاق ىسكە «قازاقپارات» ۇجىمى دا جۇمىلىپ وتىر.