قاسىم-جومارت توقايەۆ جارىلىستاردىڭ سەبەپتەرىن مۇقيات زەرتتەۋدى تالاپ ەتتى
بۇل جايىندا ق ر پرەزيدەنتىنىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا جازدى، دەپ حابارلايدى قازاقپارات ءتىلشىسى.
«قازاقستان پرەزيدەنتى ارىس قالاسىنداعى جاعدايمەن تانىسۋ ءۇشىن تۇركىستان وبلىسىنا كەلدى. مەملەكەت باسشىسى قارۋ-جاراق قويماسىنداعى جارىلىستاردىڭ زارداپتارىن قالپىنا كەلتىرۋ جونىندەگى جەدەل شتابتىڭ وتىرىسىن وتكىزدى. وبلىس باسشىسى ءومىرزاق شوكەيەۆ پرەزيدەنت قاسىم-جومارت توقايەۆقا وقيعا ورنىنداعى جاعداي مەن اتقارىلىپ جاتقان ءىس-شارالار تۋرالى باياندادى. مەملەكەت باسشىسى ەڭ الدىمەن قايتىس بولعان ازاماتتىڭ جاقىندارى مەن تۋىستارىنا كوڭىل ايتتى»، - دەپ اتاپ وتەدى بەرىك ءۋالي.
ونىڭ اتاپ وتۋىنشە، پرەزيدەنت باسپاناسىز قالعان ازاماتتاردى جەدەل ورنالاستىرۋدى قامتاماسىز ەتۋ ءۇشىن شۇعىل شارالار قابىلداپ، زارداپ شەككەندەرگە قاجەتتى جان-جاقتى كومەك، سونىڭ ىشىندە مەديتسينالىق جاردەم كورسەتۋدى تاپسىردى.
مەملەكەت باسشىسى مەملەكەتتىك ماتەريالدىق قوردىڭ ەسەبىنەن قالانىڭ قالىپتى تىرشىلىگىن قامتاماسىز ەتۋ ءۇشىن قاجەتتى تاۋارلار مەن ماتەريالدىق قۇندىلىقتاردى بەرۋدى تاپسىردى.
«ۇكىمەت پەن وبلىس اكىمدىگىن قالپىنا كەلتىرۋ جۇمىستارىنىڭ قۇنىن ەسەپتەپ شىعارۋدى جانە تۇرعىن ۇيلەردى، ينجەنەرلىك جەلىلەردى، الەۋمەتتىك جانە باسقا دا ينفراقۇرىلىمدى قالپىنا كەلتىرۋ ءۇشىن ۇكىمەتتىڭ قورىنان قاجەتتى قاراجاتتىڭ ءبولىنۋىن قامتاماسىز ەتۋدى تاپسىردى. قاسىم-جومارت توقايەۆ وقيعا ورنىندا قۇتقارۋ جانە قالپىنا كەلتىرۋ جۇمىستارى بارىسىندا ۆەدومستۆوارالىق ءوزارا جۇيەلى ءىس-قيمىلدى ۇيىمداستىرۋدى، سونداي-اق، جارىلىستاردىڭ سەبەپتەرىن مۇقيات زەرتتەۋدى تالاپ ەتتى»، - دەدى ول.