ەڭبەك مينيسترلىگىنىڭ قىزمەتكەرلەرى ءبىر كۇندىك جالاقىسىن ارىس تۇرعىندارىنا جىبەرەدى

نۇر-سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ قىزمەتكەرلەرى ءبىر كۇندىك ەڭبەكاقىلارىن ارىس تۇرعىندارىنا كومەككە اۋدارادى، دەپ حابارلايدى قازاقپارات.

«ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ جانە ۆەدومستۆوعا باعىنىشتى ۇيىمدار مەن اۋماقتىق دەپارتامەنتتەردىڭ قىزمەتكەرلەرى ءبىر كۇندىك جالاقىسىن تۇركىستان وبلىسى ارىس قالاسىنىڭ تۇرعىندارىنا كومەك ءۇشىن اۋدارادى. مينيسترلىك بارلىق كاسىپورىندار مەن كومپانيالاردى، ءىرى جۇمىس بەرۋشىلەر مەن اپاتقا نەمقۇرايلى قارامايتىن قازاقستاندىقتاردى اسكەري بولىمدەگى وق-دارىلەر جارىلىسىنان زارداپ شەككەن وتانداستارىمىزعا كومەكتەسۋگە شاقىرادى»، - دەپ جازدى مينيسترلىكتىڭ باسپا ءسوز حاتشىسى قانات قۇلشىمانوۆ الەۋمەتتىك جەلىدە.

«قيىن جاعدايدا قالعان ارىس تۇرعىندارىنا كومەكتەسۋ - ءبىزدىڭ ازاماتتىق پارىزىمىز. بىرىكسەك، بارلىق قيىندىقتى ەڭسەرىپ شىعامىز»، - دەپ جازدى ول.