ارىستا بوس قالعان ۇيلەردە ۇرلىق-قارلىق بولمايدى - ق ر قورعانىس ءمينيسترى
ەڭ الدىمەن مينيستر جارىلىستان قازا تاپقان تۇرعىننىڭ جاقىندارىنا كوڭىل ايتتى.
«قازا تاپقان كىسىنىڭ جاقىن تۋىستارىنا جانە جاراقات العاندارعا كوڭىل ايتامىز. بۇگىن ارىس قالاسىندا اسكەري وق- دارىلەر ارسەنالى قويمالارىنىڭ بىرىندە ءورت شىعىپ، جارىلىس بولدى. جارىلىس باسقا قويمالارعا جالعاستى، سوندىقتان بىرنەشە قويما جارىلىپ كەتتى. ءوڭىر اكىمدىگى پەن ت ج كوميتەتىنىڭ ءىس-ارەكەتىنىڭ ارقاسىندا ەلدى مەكەندەردەن بارلىق تۇرعىندار شىعارىلدى»، - دەدى مينيستر ارىس قالاسىندا تىكەلەي ەفيردە وتكەن بريفينگتە.
سونىمەن بىرگە، ن. ەرمەكبايەۆ ارسەنالدا قاۋىپتى وق-دارىلەردىڭ ساقتالماعانىن جەتكىزدى.
«بۇل ارسەنالدا قاۋىپتى وق- دارىلەر مەن بومبالاردىڭ ساقتالماعانىن رەسمي مالىمدەيمىن. بارلىق وق-دارىلەر ساقتىق ءۇشىن دالاعا قاراي باعىتتالىپ قويىلعان جانە نەگىزگى سوققى تولقىنى دالاعا قاراي ءجۇردى. تولقىننىڭ ءبىر بولىگى ەلدى مەكەنگە اسەر ەتىپ، بىرنەشە باسپانانىڭ شاتىرى مەن تەرەزەسىنە زاقىم كەلدى. قاۋىپسىزدىك ءۇشىن ارىس تۇرعىندارىنا جاقىن ارادا جەدەل شتابتىڭ رۇقساتىنسىز ۇيلەرىنە كەلمەۋدى سۇرايمىز. سەبەبى ارىستىڭ كوشەلەرىندە جارىلماي قالعان وق-دارىلەر بولۋى مۇمكىن. قازىر ءبىر توپ ساپەر تازالاۋ جۇمىستارىن جۇرگىزىپ جاتىر. بۇل جۇمىستار اياقتالعان سوڭ، تۇرعىندار ءوز ۇيلەرىنە ورالا الادى. قازىر بارلىق ۇيلەر مەن كۆارتالدار پوليتسيا مەن قارۋلى كۇشتەردىڭ ءجىتى باقىلاۋىندا. سوندىقتان مۇلىكتىڭ ساقتالۋى جونىندە تۇرعىندار ۋاقىمداماعانى ءجون. ەشقانداي توناۋشىلىق پەن ۇرلىق-قارلىق بولمايدى»، - دەدى قورعانىس ءمينيسترى.