پرەزيدەنت قاسىم-جومارت توقايەۆ ارىستاعى وقيعاعا بايلانىستى تۇركىستان وبلىسىنا بارادى
بۇل تۋرالى مەملەكەت باسشىسىنىڭ باسپا ءسوز حاتشىسى بەرىك ءۋالي ءمالىم ەتتى، دەپ حابارلايدى قازاقپارات.
«مەملەكەت باسشىسىمەن بىرگە پرەمەر-ءمينيستردىڭ ورىنباسارى جەڭىس قاسىمبەك جانە قۇزىرلى مەملەكەتتىك ورگانداردىڭ باسشىلارى دا بارادى.
پرەزيدەنت تۇسكە دەيىن قورعانىس، ىشكى ىستەر مينيسترلەرىنە جانە تۇركىستان وبلىسىنىڭ اكىمىنە ارىستاعى جارىلىستىڭ زارداپتارىن جويۋ جونىندە شۇعىل شارالار قابىلداۋدى، تۇرعىنداردىڭ قاۋىپسىزدىگىن قامتاماسىز ەتۋدى جانە جارىلىستىڭ سەبەپتەرىن انىقتاۋدى تاپسىرعان بولاتىن»، - دەدى ب. ءۋالي.
ەسكە سالايىق، بۇگىن تاڭەرتەڭ تۇركىستان وبلىسىنىڭ ارىس قالاسىنداعى اسكەري ءبولىم قويماسىندا جارىلىس بولدى. بىرنەشە ءوڭىردىڭ توتەنشە جاعدايلار دەپارتامەنتى شۇعىل جەلىلەر قۇردى. كوپ ۇزاماي وبلىس باسشىسى ءومىرزاق شوكەيەۆ باستاعان ارنايى كوميسسيا ارىستاعى اسكەري بولىمگە اتتاندى. جاعدايدىڭ اۋقىمىمەن تانىسقان ءوڭىر اكىمى ارىس تۇرعىندارىن ەۆاكۋاتسيالاۋ تۋرالى شەشىم قابىلدانعانىن ءمالىم ەتتى. ق ر ءى ءى م توتەنشە جاعدايلار كوميتەتى تۇرعىندار قايدا جانە قالاي ەۆاكۋاتسيالانىپ جاتقانىن حابارلادى.
ق ر پرەزيدەنتى قاسىم-جومارت توقايەۆ ءتيىستى ورگاندارعا ارىستاعى توتەنشە جاعدايدىڭ زارداپتارىن جويۋ تۋرالى تاپسىرما بەردى.
ق ر قورعانىس مينيسترلىگى رەسمي اقپارات تاراتىپ، تۇسكە دەيىنگى ۋاقىتتاعى جاعداي بويىنشا زارداپ شەككەندەر جوقتىعىن ايتتى. كەيىن حابارلانعانداي، وقيعا ورنىنا قورعانىس ءمينيسترى نۇرلان ەرمەكبايەۆ ۇشىپ شىقتى.
وقيعا سالدارىنان زارداپ شەككەن 11 ادام شىمكەنت اۋرۋحاناسىنا جەتكىزىلدى.
تۇركىستان وبلىسىنىڭ اۋرۋحانالارىنا 31 ادام ءتۇستى.
وسى ۋاقىتتا ارىس قالاسىندا ءوتىپ جاتقان بريفينگتە ءمالىم بولعانداي، وقيعا سالدارىنان ءبىر ادام قازا بولدى.