ارىستاعى جارىلىس: جەدەل شتاب قۇرىلىپ، جاپا شەككەندەرگە بارلىق كومەك كورسەتىلۋدە
بۇل تۋرالى وبلىستىق قوعامدىق دەنساۋلىق ساقتاۋ باسقارماسىنان ءمالىم ەتتى، دەپ حابارلايدى قازاقپارات ءتىلشىسى.
ناۋقاستاردىڭ باسىم بولىگى وبلىستىق كلينيكالىق اۋرۋحانادا جاتىر. ولارعا بارلىق قاجەتتى مەديتسينالىق كومەك كورسەتىلۋدە. ارىستاعى توتەنشە جاعدايعا وراي ورداباسى اۋدانىندا مەديتسينالىق شتاب قۇرىلدى.
تۇركىستان وبلىسى دەنساۋلىق ساقتاۋ باسقارماسىنىڭ باسشىسى مۇقان ەگىزبايەۆتىڭ باسقارۋىمەن شۇعىل جۇمىستار جۇرگىزىلىپ جاتىر. ورداباسى اۋداندىق ورتالىق اۋرۋحانادا جانە وبلىستىق كلينيكالىق اۋرۋحانادا 200-دەن استام ناۋقاسقا ارنالعان ورىن دايىندالدى.
جەدەل جاردەم بريگاداسىنىڭ 30 كولىگى شىمكەنت قالاسىنا كىرەر 3 جولعا قويىلدى. قاجەت بولعان جاعدايدا بىرنەشە اۋدانداردان الدىرىلعان قوسىمشا جەدەل جاردەم كولىكتەرى دايىن.
«وبلىستىق كلينيكالىق اۋرۋحانادان تراۆماتولوگ، حيرۋرگ، رەانيماتولوگ دارىگەرلەر قۇرىلعان مەديتسينالىق شتابقا جينالدى. قازىرگى كەزدە جاراقات العاندار جوق. ەۆاكۋاتسيا جۇمىستارى جۇرگىزىلىپ جاتىر. ارىس قالالىق ورتالىق اۋرۋحاناسى مەن ەمحاناسىنان ناۋقاستار ەۆاكۋاتسيالاندى. ماماندار دا جەدەل جاردەم كولىكتەرى دە وبلىس بويىنشا جەتكىلىكتى»، - دەلىنگەن اقپاراتتا.
ايتا كەتەيىك، بۇعان دەيىن زارداپ شەككەن 11 ادام شىمكەنت اۋرۋحاناسىنا جەتكىزىلگەن بولاتىن.