جارناما پسيحولوگياسى

 نۇر-سۇلتان. قازاقپارات - پسيحولوگيانىڭ دامۋىمەن، ونىڭ مەحانيزمدەرى مەن قاعيداتتارىن ءتۇسىنىپ الۋمەن بىرگە جاڭا ءبىلىم سالاسى - جارناما پسيحولوگياسى پايدا بولدى.

ول بىزگە ايتەۋىر بىردەڭەنى قايتا-قايتا ساتىپ الا بەرۋگە تۇرتكى بولاتىن ونىمدەردى جارنامالاۋدىڭ مەيلىنشە پارمەندى ستراتەگيالارىن زەرتتەيدى. البەتتە، جارناما پسيحولوگياسى جونىنەن ءبىلىم ماركەتولوگتارعا عانا كەرەك ەمەس: وزدەرىنە ىقپال ەتىپ جاتقانىن ءبىلىپ- ءتۇسىنىپ العان قاراپايىم ادامدار بۇدان ساقتانا جانە ەڭ بەرى بولعاندا قارجىسىن ۇنەمدەي الادى.

تۇتىنۋشىلاردىڭ رەاكسيالارىن زەرتتەپ ءبىلۋ

جارناما پسيحولوگياسى سالاسىنا، سونداي-اق، الۋان ءتۇرلى ماركەتينگ مەحانيزمدەرىنىڭ ادام مىيىنا ىقپالىن زەرتتەۋ، سونىمەن قاتار بەلگىلى ءبىر پارامەترلەرگە رەاكتسيانى زەردەلەۋ جۇيەسى كىرەدى. مىسالى، ادامداردىڭ جارناماعا، ينتەرنەت-دۇكەندەرگە جانە ونىمدەردىڭ وزدەرىنە ولاردىڭ تۇسىنە بايلانىستى رەاكسياسى ءارقالاي بولادى.

ءتۇس (رەڭ) پسيحولوگياسى جونىندە ءبىلۋ ماركەتولوگتارعا ساتىپ الۋشىلار بايقايتىن جارنامانى، ادامداردىڭ كوڭىلىنە سەنىم سەزىمىن ۇيالاتاتىن ينتەرنەت-دۇكەننىڭ ديزاينىن جانە ساتىپ العىڭ كەلىپ كەتەتىن ءونىمدى جاساپ شىعارۋعا سەپتىگىن تيگىزەدى.

سەنىم

جارنامانىڭ فۋنكسياسى نە؟ جارنامانىڭ ءبىزدى قانداي دا ءبىر تاۋاردىڭ بار ەكەنىنەن، ونىڭ ەرەكشە قاسيەتتەرىنەن حاباردار ەتكەننەن بولەك، ول ءبىزدى وسى تاۋاردى ساتىپ الۋ قاجەتتىگىنە ناندىرادى. وسى سەبەپتى جارناماشىلار ناندىرىپ- سەندىرۋ پسيحولوگياسىنىڭ قىزمەتىنە جۇگىنەدى.

بۇل سالادا قولدانىلاتىن قۇرالداردىڭ ءتۇرى كوپ. مىسالى، تۇتىنۋشىلاردى، بەلگىلى ءبىر ءونىمدى تاڭداۋى ءۇشىن، «ساراپشىلار كەڭەس بەرەدى» نەمەسە «كوپشىلىكتىڭ تاڭداۋى» دەگەن سياقتى ناندىرۋ ۇلگىلەرى پايدالانىلادى.

نەمەسە «ءار ادام ... مىندەتتى»، «ءسىز ءالى... وندا ءبىز سىزگە بارامىز» دەگەن سوزدەردى ايتىپ، ادامداردى جارنامالانىپ جاتقان تاۋار - سىزگە اسا قاجەت نارسە دەپ ويلاپ قالۋعا ماجبۇرلەيدى، ال شىندىعىندا ول تاۋاردىڭ كەرەك بولىپ تۇرعانى شامالى. باسقالار سياقتى بولۋ، ەلدەن بولەكتەنگىمىزدىڭ كەلمەۋى كوبىنەسە ءبىزدى مۇلدەم قاجەتى جوق زاتتاردى ساتىپ الۋعا يتەرمەلەيدى.

اكسيولوگيا جانە قاجەتتىلىكتەرىمىزدى تانىپ ءبىلۋ

اكسيولوگيا - بۇل قۇندىلىقتار جايىنداعى عىلىم. ماركەتولگتار نەنى قالايتىنىمىزدى جانە نەنى قاجەتسىنەتىنىمىزدى بىلەدى. ءاربىر جارنامالاناتىن تاۋار وسى قاجەتتىلىكتەردى وتەۋ، ساتىپ الۋشىنىڭ ءومىرىن جاقسارتۋ ءۇشىن قاجەت نارسە رەتىندە ۇسىنىلادى.

امبەباپ، ءار ادامنىڭ كوڭىلىنە جاقىن قۇندىلىقتار بار: سۇيىسپەنشىلىك، باقىت، قارجىدان تارىقپاۋشىلىق، دەننىڭ ساۋلىعى، باسقا ادامداردىڭ ىقىلاس- ءىلتيپاتى جانە ت. ب. ءساپ سالىپ قاراساڭىز، جارنامالاناتىن ونىمدەردىڭ بارلىعىنا دەرلىگى سىزگە اڭساعان ارماندارىڭىزعا جەتۋگە سەپ بولۋعا جارالعانداي بولىپ كورسەتىلەتىنىن بايقايسىز.

كيىم، مىسالى، ءسىزدى مىندەتتى تۇردە ادەمى ءارى سۇيكىمدى ەتىپ جىبەرەدى، اۆتوكولىكتىڭ جارناماسى ماشينانى ساتىپ الساق، وتباسىلىق باقىتقا بولەنەتىنىمىزدى، سەنىمدى بولاتىنىمىزدى نەمەسە باستىق بولىپ شىعا كەلەتىنىمىزدى ايتقىسى كەلەتىندەي بولىپ تۇرادى. ءبىز تاۋاردى ەمەس-اۋ، قۇندىلىقتى نەمەسە اسا ءزارۋ بولىپ وتىرعان زاتىمىزدىڭ وتەۋىن ساتىپ الامىز.

ۆيرۋستى ماركەتينگ

 لەك- لەگىمەن كەلىپ جاتاتىن جارناما بىزگە بايقالماي ءوتىپ كەتپەيدى جانە ونىڭ ءبىزدىڭ ءتۇپسانامىزدا تۇراقتاپ قالاتىن كەزدەرى سيرەك ەمەس. ءسىز بۇل ەففەكتتىڭ اسەرىن «فوكۋس» فيلمىنىڭ ۇزىندىسىنەن كورە الاسىز (بۇل جەردە جارناما تۋرالى ايتىلمايدى، ءبىراق ءدال سونداي ىقپال ەتۋ قاعيداتى كورسەتىلگەن):

بۇدان، ەگەر ءبىز ءوزىمىز دە بايقاماي، قانداي دا ءبىر تاۋاردىڭ جارناماسىن كورە نەمەسە ەستي بەرسەك، ول ءبىزدىڭ سانامىزدا تۇرىپ قالادى دا، كوپ وتپەي-اق ءبىز سول جارنامالانعان ءونىمدى ساتىپ العىمىز كەلىپ كەتەتىنى شىعادى (اسىرەسە ول ءونىم ءبىزدىڭ زارۋلىگىمىزدى وتەيتىن-ءمىس بولسا).

AIDMA

ادامنىڭ تاۋارعا قاتىستى پسيحولوگيالىق تۇرعىداعى قيمىل-ارەكەتىنىڭ سحەماسىن كورسەتەتىن ايگىلى ساتۋ فورمۋلاسى بار:

A - Attention (زەيىن، ادامنىڭ نازارىن اۋدارتۋ)

I - Interest (قىزىقتىرۋ، ەلىكتىرۋ)

D - Desire (قالاتۋ، زاۋقىن تۋدىرۋ)

M - Motivation (ىنتاسىن وياتۋ، موتيۆاتسيا)

A - Action (ارەكەتكە كوشىرۋ)

بۇل فورمۋلا بويىنشا ماركەتولوگتار اۋەلى جارناماعا ادامنىڭ نازارىن اۋدارتادى (مىسالى، القىزىل ءتۇستى پايدالانۋ ارقىلى)، سودان كەيىن ادامدى قىزىقتىرادى («جارىڭىزدى قالاي قۋانتۋدى ايتايىق پا؟»)، سودان سوڭ ساتىپ الۋدى قالايتىن جاعداي جاسايدى («العىڭىز كەلىپ تۇر»)، ەندى ساتىپ الۋعا ىنتالاندىرادى (ءسىزدىڭ جارىڭىز كەرەمەت ءلاززاتقا بولەنەدى، ول وتە قۋانىشتى جانە سىزگە العىسى شەكسىز بولادى!»)، اقىر اياعىندا كەلىپ ناقتى ارەكەت ەتەتىن جاعدايعا (ساتىپ الۋ) جەتكىزەدى. ول ءۇشىن، مىسالى، بەلگىلى ءبىر ۋاقىتقا دەيىن عانا ساتىپ الۋعا بولاتىنىن ايتادى (بۇعان اكسيا بۇگىن عانا بولىپ جاتىر) دا، ول زاتتىڭ كەرەك- كەرەك ەمەستىگىن ويلانىپ كورۋگە مۇرسات بەرمەي، ادامدى دەرەۋ ساتىپ الۋعا يتەرمەلەپ باعادى. ونىڭ ۇستىنە ءارتۇرلى جەڭىلدىكتەر دە ادامنىڭ تاۋاردى ساتىپ الۋعا دەگەن زاۋقىن ارتتىرىپ جىبەرەدى.

جورىقتى بىلگەننىڭ - اتى تاعالى،

جورانى بىلگەننىڭ - ءسوزى باعالى.

ساتۋشىنىڭ ىرقىنا جىعىلا بەرمەي، بەكەرگە مال شاشۋدان اۋلاق بولىڭىز.