موڭعوليانىڭ تۇڭعىش پرەزيدەنتى: نازاربايەۆتىڭ ماقالاسى ءبىزدى تاريحقا جاڭاشا قاراۋعا جەتەلەدى
ەلوردادا ءوتىپ جاتقان «ۇلى دالا» 4- گۋمانيتارلىق عىلىمدار فورۋمىندا موڭعوليانىڭ تۇڭعىش پرەزيدەنتى پۋنسالماايين وچيربات وسىلاي دەدى، دەپ حابارلايدى قازاقپارات ءتىلشىسى.
«موڭعولدار مەن قازاقتار الەمگە كوشپەندىلەردىڭ سيقىرلى وركەنيەتىن تارتۋ ەتكەن، ەجەلدەن تاتۋ حالىقتار. زاماننىڭ قازىرگى عىلىمى ءبىزدىڭ حالىقتارىمىزدىڭ تاريحتى، ءداستۇردى، رۋحاني بىرەگەيلىكتى، ءتىلدى بىرگە دامىتقانىن دالەلدەپ وتىر. ءبىزدىڭ ەلدەرىمىز بىرگە مەملەكەتتەردى ىرگەسىن قالاپ، ونى وركەندەتۋ جولىندا تەر توككەن»، - دەدى پۋنسالمااگين وچيربات.
پۋنسالمااگين وچيربات ءوز سوزىندە قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆپەن دوس ەكەنىن ايتىپ ءوتتى.
«ءوزىنىڭ «ۇلى دالانىڭ جەتى قىرى» ماقالاسىندا نۇرسۇلتان ءابىش ۇلى كوشپەندىلەردىڭ وركەنيەتىنە، دالا تاريحىنا ەرەكشە باعا بەرەدى. بۇل قادام تاريحقا جاڭاشا قاراۋعا جەتەلەدى. ول سونىمەن قاتار، بولاشاقتى باعدارلاۋدا باعىت-باعدار بەرىپ وتىر. قازىرگى ۋاقىتتا مەملەكەتتەر ءبىر-بىرىمەن ەتەنە ءومىر ءسۇرىپ جاتىر. كورشىلەس مەملەكەتتەر ەكونوميكانى بىرگە كوتەرىپ، ساۋدا-نارىقتىق قارىم-قاتىناسىن رەتتەۋدە. قوسىمشا مۇمكىندىكتەردى قاراستىرۋدا»، - دەدى ول.
موڭعوليانىڭ تۇڭعىش پرەزيدەنتى قازاقستان مەن موڭعوليا تاريحتى بىرگە دامىتۋ ىسىندە قازاقتار مەن موڭعولدار بىرلەسە كۇش سالىپ، كوشپەندىلەردىڭ مادەني قۇندىلىقتارىن عاسىردان عاسىرعا الىپ باراتىنىنا سەنىم ءبىلدىردى.
«قازاقستان رەسپۋبليكاسى قازىرگى ۋاقىتتا كورشىلەس مەملەكەتتەردىڭ ەكونوميكاسىنا جاعىمدى جاعىنان ىقپال ەتە الاتىن مەملەكەتكە اينالدى. ورتالىق ازيادا دا، ەۋرازيالىق ەكونوميكالىق وداق اياسىندا ىقپالى زور. قازاقستان ءوزىنىڭ تاريحىمەن، جەتىستىكتەرىمەن، ەكونوميكالىق رەفورمالارىمەن ماقتانا الاتىن مەملەكەت. وسىعان قاراماستان، اۋقىمدى قاداممەن العا قاراي جىلجىپ بارا جاتقانىنا قۋانىشتىمىز»، - دەپ ءسوزىن ءتۇيدى پۋنسالمااگين وچيربات.
ەسكە سالا كەتسەك، ەلوردادا «ۇلى دالا» 4- گۋمانيتارلىق عىلىمدار فورۋمى ءوتىپ جاتىر. شاراعا «تۇركى وركەنيەتى: ءتۇپ تامىرىنان قازىرگى زامانعا دەيىن» تاقىرىبىنا ارنالىپ وتىر.
فورۋمدا قازاقستاندىق عالىمدارمەن بىرگە ەۋروپا، ازيا مەن امەريكا قۇرلىعىنىڭ 21 ەلىنەن 250 گە جۋىق تانىمال عالىمدار مەن بەلگىلى مەملەكەت، قوعام قايراتكەرلەرى قاتىسۋدا.